Foto: kaz.tengrinews.kz

Bügin mäjilistiñ plenarlı otırısında deputat Azat Peruaşev BJZQ qarjısına alañdauşılılıq bildiretinin ayttı. Onıñ sözinşe, soñğı uaqıttağı jağdaylarğa qaramastan zeynetaqı qorı milliardtağan qarjını reytingi tömen älsiz bankterge saludı toqtatpay otır. 

«2016 jılğı jağday boyınşa eñ tömengi reytingtegi bankterde zeynetaqı qorınıñ  161 mlrd teñgesi, VV reytingine ie bankterde 79 mlrd teñge ornalastırılğan. Al mülde reytingi joq qarjı instituttarında 61 mlrd teñge bar. Reytingi AA deñgeyindegilerde bar bolğanı 983 mln teñge. YAğni bwl basqalarımen salıstırğanda 65 esege tömen. Mäsele endi Äzerbayjan bankine qatıstı bolıp twrğan joq. BAQ qarjını qaytaratının habarlap jatır. Degenmen tendenciyadan bayqağanımızday zeynataqı jinaqtarı ısırap bolıp jatır", - dep atap ötti ol Wlttıq bank törağası Daniyar Aqışevtıñ atına joldağan saualhatında.

Osığan baylanıstı deputat birneşe swraqqa jauap beriluin swradı.

«BJZQ menedjmenti nege zeynetaqı jinaqtarın saqtauğa qatıstı öz mindetterin orındamaydı? Äzerbayjan halıqaralıq banki obligaciyalarınıñ defolt bolmasına kim jauap beredi, oğan salınğan investiciya saqtandırılğan ba? Bizdiñ azamattarımızdıñ zeynetaqı jinaqtarı kimniñ tarapınan şeteldik bankti qoldauğa jwmsalıp otır? Kommunister halıq jinağınıñ jeñil jwmsaluına jol bermeu kerek dep esepteydi. Sondıqtan investiciya salu turalı şeşim qabıldağan BJZQ-nıñ lauazımdı twlğaların tauıp, tergeu jwmıstarın jürgizudi jäne jauapkerşilikke tartudı talap etemiz»,- dep atap ötti Peruaşev.

Ayta keteyik, osığan deyin BJZQ-nıñ 71,3 mlrd teñgesi nemese 200 mln dollar Äzerbayjan halıqaralıq bankiniñ obligaciyaları üşin salınğanın aytqan bolatınbız. Bloomberg agenttiginiñ mälimetinşe, Äzerbayjannıñ halıqaralıq banki eldegi valyutalıq dağdarıs pen valyutanıñ jetispeuşiligine baylanıstı sırtqı qarızdarın töleudi toqtatqan jäne kredit beruşilermen kelissöz jürgizudi bastaydı.

Osıdan soñ Äzerbayjan biligi problemalı bankke salınğan qazaqstandıq zeynetaqı qarjısı qaytarılatının mälimdegen. Qarız Wlttıq qor qarajatınan qaytarıluı mümkin.

“The Qazaq Times”