فوتو: kaz.tengrinews.kz

بۇگىن ءماجىلىستىڭ پلەنارلى وتىرىسىندا دەپۋتات ازات پەرۋاشەۆ بجزق قارجىسىنا الاڭداۋشىلىلىق بىلدىرەتىنىن ايتتى. ونىڭ سوزىنشە، سوڭعى ۋاقىتتاعى جاعدايلارعا قاراماستان زەينەتاقى قورى ميللياردتاعان قارجىنى رەيتينگى تومەن ءالسىز بانكتەرگە سالۋدى توقتاتپاي وتىر. 

«2016 جىلعى جاعداي بويىنشا ەڭ تومەنگى رەيتينگتەگى بانكتەردە زەينەتاقى قورىنىڭ  161 ملرد تەڭگەسى، ۆۆ رەيتينگىنە يە بانكتەردە 79 ملرد تەڭگە ورنالاستىرىلعان. ال مۇلدە رەيتينگى جوق قارجى ينستيتۋتتارىندا 61 ملرد تەڭگە بار. رەيتينگى اا دەڭگەيىندەگىلەردە بار بولعانى 983 ملن تەڭگە. ياعني بۇل باسقالارىمەن سالىستىرعاندا 65 ەسەگە تومەن. ماسەلە ەندى ازەربايجان بانكىنە قاتىستى بولىپ تۇرعان جوق. باق قارجىنى قايتاراتىنىن حابارلاپ جاتىر. دەگەنمەن تەندەنتسيادان بايقاعانىمىزداي زەيناتاقى جيناقتارى ىسىراپ بولىپ جاتىر", - دەپ اتاپ ءوتتى ول ۇلتتىق بانك توراعاسى دانيار اقىشەۆتىڭ اتىنا جولداعان ساۋالحاتىندا.

وسىعان بايلانىستى دەپۋتات بىرنەشە سۇراققا جاۋاپ بەرىلۋىن سۇرادى.

«بجزق مەنەدجمەنتى نەگە زەينەتاقى جيناقتارىن ساقتاۋعا قاتىستى ءوز مىندەتتەرىن ورىندامايدى؟ ازەربايجان حالىقارالىق بانكى وبليگاتسيالارىنىڭ دەفولت بولماسىنا كىم جاۋاپ بەرەدى، وعان سالىنعان ينۆەستيتسيا ساقتاندىرىلعان با؟ ءبىزدىڭ ازاماتتارىمىزدىڭ زەينەتاقى جيناقتارى كىمنىڭ تاراپىنان شەتەلدىك بانكتى قولداۋعا جۇمسالىپ وتىر؟ كوممۋنيستەر حالىق جيناعىنىڭ جەڭىل جۇمسالۋىنا جول بەرمەۋ كەرەك دەپ ەسەپتەيدى. سوندىقتان ينۆەستيتسيا سالۋ تۋرالى شەشىم قابىلداعان بجزق-نىڭ لاۋازىمدى تۇلعالارىن تاۋىپ، تەرگەۋ جۇمىستارىن جۇرگىزۋدى جانە جاۋاپكەرشىلىككە تارتۋدى تالاپ ەتەمىز»،- دەپ اتاپ ءوتتى پەرۋاشەۆ.

ايتا كەتەيىك، وسىعان دەيىن بجزق-نىڭ 71,3 ملرد تەڭگەسى نەمەسە 200 ملن دوللار ازەربايجان حالىقارالىق بانكىنىڭ وبليگاتسيالارى ءۇشىن سالىنعانىن ايتقان بولاتىنبىز. Bloomberg اگەنتتىگىنىڭ مالىمەتىنشە، ازەربايجاننىڭ حالىقارالىق بانكى ەلدەگى ۆاليۋتالىق داعدارىس پەن ۆاليۋتانىڭ جەتىسپەۋشىلىگىنە بايلانىستى سىرتقى قارىزدارىن تولەۋدى توقتاتقان جانە كرەديت بەرۋشىلەرمەن كەلىسسوز جۇرگىزۋدى باستايدى.

وسىدان سوڭ ازەربايجان بيلىگى پروبلەمالى بانككە سالىنعان قازاقستاندىق زەينەتاقى قارجىسى قايتارىلاتىنىن مالىمدەگەن. قارىز ۇلتتىق قور قاراجاتىنان قايتارىلۋى مۇمكىن.

“The Qazaq Times”