Tarazdağı qandı Qañtar: Prokuror qañtarşılarğa berilgen jazanı qatañdatudı swradı

Tarazda Qañtar oqiğası kezinde «WQK podpolkovnigi Dastan Ädilbaydı öltirdi», «qaru-jaraq wrladı jäne saqtadı» degen ayıptarmen 16 jılğa sottalğan Erbol Jwmanovtıñ jäne basqa da qañtarşılarğa qatıstı apellyaciya sotı jalğasıp jatır. 

13 şildede ötken sot procesinde advokat Jalğas Saparhanovanıñ alğaşqı sot otırısında tüsirgen ötiniş-talaptarı qaraldı. Sot alqasınıñ törağası Nwrmahammat Abidov ötinişti işinara qanağattandırdı. Sud'ya Erbol Jwmanovtıñ telefonına detalizaciya jasau ötinişin qanağattandırdı. İs materialında onıñ bir nömirine ğana detalizaciya jasalğan.

Erbol Jwmanovtıñ ağası Erjan Jwmanovtıñ oqiğa bolğan jerdegi videolardı zerttegen, biraq sud'ya olardı iske tirkeuden bas tarttı. Ol videolar onsız da is materialdarında bar ekenin alğa tartıp, aldağı uaqıtta onı saralauğa eşqanday kedergi joğın ayttı.

Erbol Jwmanovtıñ advokatı Jalğas Saparhanova jäne qoğamdıq qorğauşısı äri bauırı Erjan Jwmanov. Foto: QT / Kültegin Aspanwlı

Advokat Jalğas Saparhanova sotqa iste tirkelgen videolardıñ montajdalıp, qiılğanın däleldeytin täuelsiz saraptama qorıtındısı men oqiğa bolğan WQK ğimaratına qarama-qarsı ornalasqan üy twrğındarınan alınğan fotolardı wsındı. Sot alqası onı qabıldap, aldağı uaqıtta zerdeleytinin ayttı.

– Biz Almatıdağı «Saraptama grup» JŞS-ğa beyne fayldarğa video-foto tehnikalıq saraptama jürgizu üşin jügindik. İste tirkelgen beyne fayldarğa qaraytın bolsañız, bes rakurstan tüsirilgen beynejazbanıñ uaqıttarı ärtürli. Sondıqtan da biz beyne kesilgen, montajdalğan degen kümän tudı. Sol sebepti biz mamannıñ qorıtındısın aldıq. Onda «uaqıt taymerinde hronologiyalıq bir izdilik joq», «zerttelgen jazba syujetindegi is-äreketterdiñ logikalıq ağımı men ayaqtaluı joq», «zerttelgen fayldarğa montaj jasaluı mümkin» degen qorıtındı şığarılğan, – dedi Saparhanova.

Birinşi instanciya ükimimen sot zalınan bosap şıqqan Däuren Nwräliev pen Qanat Nwraqanwlına prokuor qamau jazasın swrağan. Foto: QT

Ol iske tıñ derekter qosılıp jatqanın alğa tartıp, qamauda otırğan Erbol Jwmanovtıñ da sotqa aytatın dälel-derekteri barın aytıp, onı sot zalına aldırudı swradı. Sot alqası qajet bolğan jağdayda onı aldağı sot otırısına aldıruğa eşqanday kedergi joq ekenin mälimdedi.

Bwdan bölek, Jalğas Saparhanova Erbol Jwmanovqa 28 säuirde ükim şıqqannan keyin N67 mekemede qısım jasalıp, azaptalğanın aytıp, dälel retinde medicinalıq saraptama qorıtındısın wsındı. Sot alqasınıñ törağası Nwrmahammat Abidov qazir Erbol Jwmanovtıñ isi qaralıp jatqanın, azaptau boyınşa qwzırlı organdar, atap aytqanda, prokuraturanıñ arnayı tobı aynalısatının alğa tartıp, prokuror Sayahat Bağdatwlına jağdaydı baqılauğa alu qajettigin ayttı. Jalğas Saparhanova azaptau boyınşa tiisti organdardıñ barlığına arızdanğanın, qazir jauap kütip otırğanın jetkizdi.

Qañtarşılar isindegi prokuror Sayahat Bağdatwlı. Foto: QT

Prokuror Sayahat Bağdatwlı sottaluşı Erbol Jwmanov, Däuren Nwräliev jäne Qanat Nwrahanwlına qarsı ötiniş hat keltirdi. Ol birinşi satılı sotta Nwräliev pen Nwrahanwlınıñ is-äreketi dwrıs saralanbağanın jäne jaza tağayındauda qılmıstıq zañ dwrıs qoldanılmağanın alğa tarttı.

Prokuror sot alqasınan birinşi satılı sot ükimin bwzıp, Däuren Nwrälievti 6 jılğa, Qanat Nwrahanwlın 7 jılğa, Erbol Jwmanovtı 16 jılğa bas bostandığınan ayırudı swradı.

Kelesi sot otırısı 21 şildede ötedi.

Erbol Jwmanov birinşi satıdağı sotta özine tağılğan ayıptı işinara moyındap, qaru-jaraq alğanın rastap, WQK podpolkovnigi Dastan Ädilbaydı öltirmegenin aytqan.

Bwl is boyınşa 9 adam sottalğan. 28 säuirde sud'ya Qadirbek Nwrjan Erbol Jwmanovtı 16 jılğa, Nwrahan Mahatov pen Aybol Sağıntaydı 6 jılğa, Jaqsılıq Abdullaevtı 5 jılğa bas bostandığınan ayıru jazasına kesip, Qanat Nwrahanwlı, Ermahan Saylauov, Däuren Nwräliev, Dosmwhammed Sadıqov jäne Salamat Qosanovtı raqımşılıq zañın paydalanıp, sot zalınan bosatqan.

The Qazaq Times