تارازداعى قاندى قاڭتار: پروكۋرور قاڭتارشىلارعا بەرىلگەن جازانى قاتاڭداتۋدى سۇرادى

تارازدا قاڭتار وقيعاسى كەزىندە «ۇقك پودپولكوۆنيگى داستان ءادىلبايدى ءولتىردى»، «قارۋ-جاراق ۇرلادى جانە ساقتادى» دەگەن ايىپتارمەن 16 جىلعا سوتتالعان ەربول جۇمانوۆتىڭ جانە باسقا دا قاڭتارشىلارعا قاتىستى اپەللياتسيا سوتى جالعاسىپ جاتىر. 

13 شىلدەدە وتكەن سوت پروتسەسىندە ادۆوكات جالعاس ساپارحانوۆانىڭ العاشقى سوت وتىرىسىندا تۇسىرگەن ءوتىنىش-تالاپتارى قارالدى. سوت القاسىنىڭ توراعاسى نۇرماحاممات ابيدوۆ ءوتىنىشتى ءىشىنارا قاناعاتتاندىردى. سۋديا ەربول جۇمانوۆتىڭ تەلەفونىنا دەتاليزاتسيا جاساۋ ءوتىنىشىن قاناعاتتاندىردى. ءىس ماتەريالىندا ونىڭ ءبىر نومىرىنە عانا دەتاليزاتسيا جاسالعان.

ەربول جۇمانوۆتىڭ اعاسى ەرجان جۇمانوۆتىڭ وقيعا بولعان جەردەگى ۆيدەولاردى زەرتتەگەن، بىراق سۋديا ولاردى ىسكە تىركەۋدەن باس تارتتى. ول ۆيدەولار ونسىز دا ءىس ماتەريالدارىندا بار ەكەنىن العا تارتىپ، الداعى ۋاقىتتا ونى سارالاۋعا ەشقانداي كەدەرگى جوعىن ايتتى.

ەربول جۇمانوۆتىڭ ادۆوكاتى جالعاس ساپارحانوۆا جانە قوعامدىق قورعاۋشىسى ءارى باۋىرى ەرجان جۇمانوۆ. فوتو: QT / كۇلتەگىن اسپانۇلى

ادۆوكات جالعاس ساپارحانوۆا سوتقا ىستە تىركەلگەن ۆيدەولاردىڭ مونتاجدالىپ، قيىلعانىن دالەلدەيتىن تاۋەلسىز ساراپتاما قورىتىندىسى مەن وقيعا بولعان ۇقك عيماراتىنا قاراما-قارسى ورنالاسقان ءۇي تۇرعىندارىنان الىنعان فوتولاردى ۇسىندى. سوت القاسى ونى قابىلداپ، الداعى ۋاقىتتا زەردەلەيتىنىن ايتتى.

– ءبىز الماتىداعى «ساراپتاما گرۋپ» جشس-عا بەينە فايلدارعا ۆيدەو-فوتو تەحنيكالىق ساراپتاما جۇرگىزۋ ءۇشىن جۇگىندىك. ىستە تىركەلگەن بەينە فايلدارعا قارايتىن بولساڭىز، بەس راكۋرستان تۇسىرىلگەن بەينەجازبانىڭ ۋاقىتتارى ءارتۇرلى. سوندىقتان دا ءبىز بەينە كەسىلگەن، مونتاجدالعان دەگەن كۇمان تۋدى. سول سەبەپتى ءبىز ماماننىڭ قورىتىندىسىن الدىق. وندا «ۋاقىت تايمەرىندە حرونولوگيالىق ءبىر ىزدىلىك جوق»، «زەرتتەلگەن جازبا سيۋجەتىندەگى ءىس-ارەكەتتەردىڭ لوگيكالىق اعىمى مەن اياقتالۋى جوق»، «زەرتتەلگەن فايلدارعا مونتاج جاسالۋى مۇمكىن» دەگەن قورىتىندى شىعارىلعان، – دەدى ساپارحانوۆا.

ءبىرىنشى ينستانتسيا ۇكىمىمەن سوت زالىنان بوساپ شىققان داۋرەن نۇراليەۆ پەن قانات نۇراقانۇلىنا پروكۋور قاماۋ جازاسىن سۇراعان. فوتو: QT

ول ىسكە تىڭ دەرەكتەر قوسىلىپ جاتقانىن العا تارتىپ، قاماۋدا وتىرعان ەربول جۇمانوۆتىڭ دا سوتقا ايتاتىن دالەل-دەرەكتەرى بارىن ايتىپ، ونى سوت زالىنا الدىرۋدى سۇرادى. سوت القاسى قاجەت بولعان جاعدايدا ونى الداعى سوت وتىرىسىنا الدىرۋعا ەشقانداي كەدەرگى جوق ەكەنىن مالىمدەدى.

بۇدان بولەك، جالعاس ساپارحانوۆا ەربول جۇمانوۆقا 28 ساۋىردە ۇكىم شىققاننان كەيىن N67 مەكەمەدە قىسىم جاسالىپ، ازاپتالعانىن ايتىپ، دالەل رەتىندە مەديتسينالىق ساراپتاما قورىتىندىسىن ۇسىندى. سوت القاسىنىڭ توراعاسى نۇرماحاممات ابيدوۆ قازىر ەربول جۇمانوۆتىڭ ءىسى قارالىپ جاتقانىن، ازاپتاۋ بويىنشا قۇزىرلى ورگاندار، اتاپ ايتقاندا، پروكۋراتۋرانىڭ ارنايى توبى اينالىساتىنىن العا تارتىپ، پروكۋرور ساياحات باعداتۇلىنا جاعدايدى باقىلاۋعا الۋ قاجەتتىگىن ايتتى. جالعاس ساپارحانوۆا ازاپتاۋ بويىنشا ءتيىستى ورگانداردىڭ بارلىعىنا ارىزدانعانىن، قازىر جاۋاپ كۇتىپ وتىرعانىن جەتكىزدى.

قاڭتارشىلار ىسىندەگى پروكۋرور ساياحات باعداتۇلى. فوتو: QT

پروكۋرور ساياحات باعداتۇلى سوتتالۋشى ەربول جۇمانوۆ، داۋرەن نۇراليەۆ جانە قانات نۇراحانۇلىنا قارسى ءوتىنىش حات كەلتىردى. ول ءبىرىنشى ساتىلى سوتتا نۇراليەۆ پەن نۇراحانۇلىنىڭ ءىس-ارەكەتى دۇرىس سارالانباعانىن جانە جازا تاعايىنداۋدا قىلمىستىق زاڭ دۇرىس قولدانىلماعانىن العا تارتتى.

پروكۋرور سوت القاسىنان ءبىرىنشى ساتىلى سوت ۇكىمىن بۇزىپ، داۋرەن نۇراليەۆتى 6 جىلعا، قانات نۇراحانۇلىن 7 جىلعا، ەربول جۇمانوۆتى 16 جىلعا باس بوستاندىعىنان ايىرۋدى سۇرادى.

كەلەسى سوت وتىرىسى 21 شىلدەدە وتەدى.

ەربول جۇمانوۆ ءبىرىنشى ساتىداعى سوتتا وزىنە تاعىلعان ايىپتى ءىشىنارا مويىنداپ، قارۋ-جاراق العانىن راستاپ، ۇقك پودپولكوۆنيگى داستان ءادىلبايدى ولتىرمەگەنىن ايتقان.

بۇل ءىس بويىنشا 9 ادام سوتتالعان. 28 ساۋىردە سۋديا قادىربەك نۇرجان ەربول جۇمانوۆتى 16 جىلعا، نۇراحان ماحاتوۆ پەن ايبول ساعىنتايدى 6 جىلعا، جاقسىلىق ابدۋللاەۆتى 5 جىلعا باس بوستاندىعىنان ايىرۋ جازاسىنا كەسىپ، قانات نۇراحانۇلى، ەرماحان سايلاۋوۆ، داۋرەن نۇراليەۆ، دوسمۇحاممەد سادىقوۆ جانە سالامات قوسانوۆتى راقىمشىلىق زاڭىن پايدالانىپ، سوت زالىنان بوساتقان.

The Qazaq Times