Bügin Almatınıñ mamandandırılğan audanaralıq qılmıstıq sotında tört aydan asa qaralğan Qañtar oqiğası jöninde "Äuejay isi" boyınşa ükim oqıldı.

Sebepsiz keşiktirilgen ükim

Jarıssöz ötken soñğı otırısta sud'ya Martpek Kakimjanov ükim uaqıtın sağat 11:00-ge belgilegen edi. Bügin osı kezde ondağan azamat barğan. Sot ğimaratınıñ aldına jinalğan ayıptaluşılardıñ jaqtastarına jäne advokattarğa sot hatşısı şığıp, ükim sağat 15.00-de oqılatının habarladı.

Jinalğandar ğimarat işine kirip, dälizde "Bostandıq!" dep ayqayladı. Sırtta "Halıq terrorist emes!" degen plakat wstap twrıp, "sayasi twtqındarğa bostandıq" talap etti. "Oyan, Qazaqstan!" qozğalısı men "Feminita" wyımınıñ belsendileri de ğimarat aldında "Belsendilik – terrorizm emes", "Jazıqsızdarğa ädildik", "Äygerimge bostandıq" jäne "Atqandardı sottañdar" degen jazuı bar plakattar wstap wrandattı.

Kakimjanovtıñ "ädildigi"

Qoğam nazarın erekşe audarğan sot isin qazaqşa qaraudan bas tartqan, procesti öte asığıs qarağan sud'ya Kakimjanov tüs aua ükim oqıdı. Almatınıñ mamandandırılğan audanaralıq qılmıstıq sotı "Äuejay isimen" ayıptalğan qañtarşılardıñ beseuin de kinäli dep tanıdı. Sud'ya Kakimjanov Qalas Nwrpeyisov, Nwrlan Dälibaev, Ermwhamet Şilibaev, Janaydar Kärmenovterge 8 jıl, Aygerim Tileujanğa 4 jıl kesti.

Bwğan deyin prokuror Bekzat Seytimbet ayıptaluşılar Qalas Nwrpeyisov, Nwrlan Dälibaev, Ermwhamet Şilibaev, Janaydar Kärmenovterge 11 jıl, Aygerim Tileujanğa bes jıl jaza kesudi swrağan.

Prokurordıñ qorıtındı ayıptau aktisinde Aygerim Tileujan men Qalas Nwrpeyisov Qañtar oqiğası kezinde Almatı äuejayında narazı toptıñ aldında "bilikke qarsı sözder aytıp, olardı zañsız is-äreketke aydap salıp, jappay tärtipsizdik wyımdastırğan" dedi. Sonımen qosa, Nwrpeyisov, Dälibaev, Şilibaev pen Kärmenov "ğimarattarğa şabuıl jasap", "kölikterdi tartıp alğan, bötenniñ mülkin jımqırğan" dep ayıptadı.

Prokuror Bekzat Seytimbet. Foto: QT / Kültegin Aspanwlı

"Äuejay isiniñ" konteksi

Qañtarşılar özderine tağılğan ayıptı moyındamaydı. Mwnı osığan deyin aytıp ta keledi. Bes qañtarşınıñ ekeui – jurnalist-audarmaşı Aygerim Tileujan men tarih mwğalimi Qalas Nwrpeyisov Nazarbaev jäne Toqaev jüyesin köp sınap, azamattıq belsendi retinde tanılğan.

Sot otırısında Qalasov pen Tileujannıñ "jappay tärtipsizdik wyımdastırğanın" köresetetin videonı sud'ya "jetkilikti dälel bola almaydı" dep isten alıp tastağan. Foto: QT / Kültegin Aspanwlı

Biıl 5 qañtarda parlamentte söylegen bas prokuror Berik Asılov "Dini ekstremistik wyımdardıñ eki müşesi Qalas Nwrpeyisov pen Aygerim Tileujan Almatı äuejayın basıp alğan" dep mälimdedi. Ekeuiniñ advokattarı bas prokuror osı sözimen sotı bolmay, ükim şıqpay twrıp, Nwrpeyisov pen Tileujannıñ konstituciyalıq qwqığı – kinäsizdik prezumpciyasın bwzdı dep tanığan. Osı uäjben Parlament Senatına, Bas prokuraturağa jügingen. Biraq bas prokurordıñ zañ bwzuşılığın eşkim jauapqa tartpadı.

Aygerim Tileujan bilik özin sottau arqılı bas prokuror Berik Asılovtıñ jalasın aqtap-zañdastırmaq dep esepteydi. Ol soñğı sözinde jeti ay boyı kuä bolıp, keyin küdiktige aynaluı sayasi tapsırıs ekenine senimdi. Osığan wqsas bağanı qwqıq qorğauşılar men sarapşılar, azamattıq qoğam ökilderi de bergen.

;t=559s

The Qazaq Times