بۇگىن الماتىنىڭ مامانداندىرىلعان اۋدانارالىق قىلمىستىق سوتىندا ءتورت ايدان اسا قارالعان قاڭتار وقيعاسى جونىندە "اۋەجاي ءىسى" بويىنشا ۇكىم وقىلدى.

سەبەپسىز كەشىكتىرىلگەن ۇكىم

ءجارىسسوز وتكەن سوڭعى وتىرىستا سۋديا مارتپەك كاكيمجانوۆ ۇكىم ۋاقىتىن ساعات 11:00-گە بەلگىلەگەن ەدى. بۇگىن وسى كەزدە ونداعان ازامات بارعان. سوت عيماراتىنىڭ الدىنا جينالعان ايىپتالۋشىلاردىڭ جاقتاستارىنا جانە ادۆوكاتتارعا سوت حاتشىسى شىعىپ، ۇكىم ساعات 15.00-دە وقىلاتىنىن حابارلادى.

جينالعاندار عيمارات ىشىنە كىرىپ، دالىزدە "بوستاندىق!" دەپ ايقايلادى. سىرتتا "حالىق تەرروريست ەمەس!" دەگەن پلاكات ۇستاپ تۇرىپ، "ساياسي تۇتقىندارعا بوستاندىق" تالاپ ەتتى. "Oyan, Qazaqstan!" قوزعالىسى مەن "فەمينيتا" ۇيىمىنىڭ بەلسەندىلەرى دە عيمارات الدىندا "بەلسەندىلىك – تەرروريزم ەمەس", "جازىقسىزدارعا ادىلدىك", "ايگەرىمگە بوستاندىق" جانە "اتقانداردى سوتتاڭدار" دەگەن جازۋى بار پلاكاتتار ۇستاپ ۇرانداتتى.

كاكيمجانوۆتىڭ "ادىلدىگى"

قوعام نازارىن ەرەكشە اۋدارعان سوت ءىسىن قازاقشا قاراۋدان باس تارتقان، پروتسەستى وتە اسىعىس قاراعان سۋديا كاكيمجانوۆ ءتۇس اۋا ۇكىم وقىدى. الماتىنىڭ مامانداندىرىلعان اۋدانارالىق قىلمىستىق سوتى "اۋەجاي ىسىمەن" ايىپتالعان قاڭتارشىلاردىڭ بەسەۋىن دە كىنالى دەپ تانىدى. سۋديا كاكيمجانوۆ قالاس نۇرپەيىسوۆ، نۇرلان دالىباەۆ، ەرمۇحامەت شيلىباەۆ، جانايدار كارمەنوۆتەرگە 8 جىل، ايگەرىم تىلەۋجانعا 4 جىل كەستى.

بۇعان دەيىن پروكۋرور بەكزات سەيتىمبەت ايىپتالۋشىلار قالاس نۇرپەيىسوۆ، نۇرلان دالىباەۆ، ەرمۇحامەت شيلىباەۆ، جانايدار كارمەنوۆتەرگە 11 جىل، ايگەرىم تىلەۋجانعا بەس جىل جازا كەسۋدى سۇراعان.

پروكۋروردىڭ قورىتىندى ايىپتاۋ اكتىسىندە ايگەرىم تىلەۋجان مەن قالاس نۇرپەيىسوۆ قاڭتار وقيعاسى كەزىندە الماتى اۋەجايىندا نارازى توپتىڭ الدىندا "بيلىككە قارسى سوزدەر ايتىپ، ولاردى زاڭسىز ءىس-ارەكەتكە ايداپ سالىپ، جاپپاي تارتىپسىزدىك ۇيىمداستىرعان" دەدى. سونىمەن قوسا، نۇرپەيىسوۆ، دالىباەۆ، شيلىباەۆ پەن كارمەنوۆ "عيماراتتارعا شابۋىل جاساپ", "كولىكتەردى تارتىپ العان، بوتەننىڭ مۇلكىن جىمقىرعان" دەپ ايىپتادى.

پروكۋرور بەكزات سەيتىمبەت. فوتو: QT / كۇلتەگىن اسپانۇلى

"اۋەجاي ءىسىنىڭ" كونتەكسى

قاڭتارشىلار وزدەرىنە تاعىلعان ايىپتى مويىندامايدى. مۇنى وسىعان دەيىن ايتىپ تا كەلەدى. بەس قاڭتارشىنىڭ ەكەۋى – جۋرناليست-اۋدارماشى ايگەرىم تىلەۋجان مەن تاريح مۇعالىمى قالاس نۇرپەيىسوۆ نازارباەۆ جانە توقاەۆ جۇيەسىن كوپ سىناپ، ازاماتتىق بەلسەندى رەتىندە تانىلعان.

سوت وتىرىسىندا قالاسوۆ پەن تىلەۋجاننىڭ "جاپپاي تارتىپسىزدىك ۇيىمداستىرعانىن" كورەسەتەتىن ۆيدەونى سۋديا "جەتكىلىكتى دالەل بولا المايدى" دەپ ىستەن الىپ تاستاعان. فوتو: QT / كۇلتەگىن اسپانۇلى

بيىل 5 قاڭتاردا پارلامەنتتە سويلەگەن باس پروكۋرور بەرىك اسىلوۆ ء"دىني ەكسترەميستىك ۇيىمداردىڭ ەكى مۇشەسى قالاس نۇرپەيىسوۆ پەن ايگەرىم تىلەۋجان الماتى اۋەجايىن باسىپ العان" دەپ مالىمدەدى. ەكەۋىنىڭ ادۆوكاتتارى باس پروكۋرور وسى سوزىمەن سوتى بولماي، ۇكىم شىقپاي تۇرىپ، نۇرپەيىسوۆ پەن تىلەۋجاننىڭ كونستيتۋتسيالىق قۇقىعى – كىناسىزدىك پرەزۋمپتسياسىن بۇزدى دەپ تانىعان. وسى ۋاجبەن پارلامەنت سەناتىنا، باس پروكۋراتۋراعا جۇگىنگەن. بىراق باس پروكۋروردىڭ زاڭ بۇزۋشىلىعىن ەشكىم جاۋاپقا تارتپادى.

ايگەرىم تىلەۋجان بيلىك ءوزىن سوتتاۋ ارقىلى باس پروكۋرور بەرىك اسىلوۆتىڭ جالاسىن اقتاپ-زاڭداستىرماق دەپ ەسەپتەيدى. ول سوڭعى سوزىندە جەتى اي بويى كۋا بولىپ، كەيىن كۇدىكتىگە اينالۋى ساياسي تاپسىرىس ەكەنىنە سەنىمدى. وسىعان ۇقساس باعانى قۇقىق قورعاۋشىلار مەن ساراپشىلار، ازاماتتىق قوعام وكىلدەرى دە بەرگەن.

;t=559s

The Qazaq Times