«كوپ جىلدىق ءمىنسىز قىزمەتى» جاۋاپكەرشىلىكتەن قۇتقارعان مەيرامباي كەمالوۆ. فوتو: وكق

جۋرناليستەردى يتكە تەڭەپ بالاعاتتاعان، قىزمەتتىك ەتيكانى ورەسكەل بۇزعان باس پروكۋراتۋرا قىزمەتكەرى تەك ەسكەرتۋمەن شەكتەلدى. جاۋاپكەرشىلىكتەن جالتارۋعا «كوپ جىلدىق ءمىنسىز قىزمەتى» كومەكتەسكەن. ارادا ەكى جارىم اي وتسە دە كەمالوۆ تىلشىلەر مەن قوعامنان كەشىرىم سۇراماعان.

باس پروكۋروردىڭ 5 قاڭتار كۇنگى ءماجىلىس وتىرىسىندا قاڭتار تۋرالى بايانداماسىنان كەيىن دە كوپ ساۋالعا جاۋاپ الماعان جۋرناليستەر كلۋاردا وزىنەن سۇراماق بولعان. اجەتحانا الدىندا اسىلوۆتىڭ شىعۋىن كۇزەتكەن باس پروكۋراتۋرانىڭ پارلامەنتتەگى رەسمي وكىلى مەيرامباي كەمالوۆ كۇتىپ تۇرعان كوپشىلىككە قاراتا «كەتىڭدەر، سەندەر يتسىڭدەر» دەگەن ءسوزى جەلىگە تاراعان ەدى. قوعام نارازىلىعىن تۋدىرعان زاڭ قاداعالاۋشى ورگان قىزمەتكەرىنىڭ دورەكىلىگىنە باق قاۋىمداستىعى اتىنان ۇجىمدىق ارىز جازىلعان.

ەكى اپتادان سوڭ باس پروكۋروردىڭ ورىنباسارى اسەت شىنداليەۆ ارىز نەگىزىندە تەكسەرىس ءجۇرىپ جاتقانىن ايتقان. QT رەداكتسياسى دا باس پروكۋراتۋرانىڭ ءباسپاسوز وكىلى دارحان دۇيسەمبايمەن اپتالاپ حابارلاسىپ، بايلانىسا الماعان سوڭ اسىلوۆتىڭ اتىنا قولدانىلعان شارا، تارتىلعان جاۋاپكەرشىلىگى جونىندە رەسمي سۇراۋ جولداعان.

باس پروكۋراتۋرانىڭ ارنايى پروكۋرورلار قىزمەتى باستىعى ريزابەك وجاروۆتان كەلگەن رەسمي جاۋاپ حاتتا زاڭدا جوق تارماقشاعا سۇيەنىپ، ەسكەرتۋ بەرگەنى جازىلعان.

«باس پروكۋراتۋرانىڭ قىزمەتكەرلەرىنە قاتىستى تارتىپتىك شارا قولدانۋ بويىنشا، مەيرامباي كەمالوۆتىڭ ءىس-ارەكەتىندە قر مەملەكەتتىك قىزمەتشىلەردىڭ ەتيكالىق كودەكسىنىڭ 8-تارماعى 13-تارماقشاسىندا كورسەتىلگەن مورالدىق-پسيحولوگيالىق ءتوزىمدى، ۇستامدى بولۋ، ازاماتتارمەن قارىم-قاتىناستا سىپايىلىق پەن زەيىندىلىك تانىتۋ تالاپتارىن بۇزۋ بەلگىلەرى بايقالادى. الايدا، م.كەمالوۆتىڭ كوپ جىلدىق ءمىنسىز قىزمەتىن ەسكەرىپ، وعان قاتىستى قىزمەتتىك ءتارتىپتى جانە ەتيكالىق نورمالاردى ساقتاۋ قاجەتتىگى جونىندە قاتاڭ ەسكەرتۋمەن شەكتەلۋ تۋرالى شەشىم قابىلداندى»، – دەلىنگەن.

وجاروۆ كورسەتكەن 8-تارماق كودەكستە بولىگى رەتىندە وقىلۋى ءتيىس جانە بۇل بولىكتە ءوزى بارلىعى 8 تارماقشا بار، 13 ەمەس. ادەپ كودەكسى بارىنە ورتاق بىرەۋ عانا ەكەنىن ەسكەرسەك، باس پروكۋراتۋرا سىلتەگەن نورمانىڭ شىنايىلىعى كۇمان تۋعىزادى. رەداكتسيا ءتىلشىسى مالىمەتتەردى زەردەلەي كەلە وجاروۆتىڭ جاڭىلىسقان تۇسىن انىقتادى. 8-بولىكتىڭ 13-تارماعى «مەملەكەتتىك قىزمەتشىلەردىڭ ەتيكا كودەكسىنە» ەمەس، «قۇقىق قورعاۋ ورگاندارى، ازاماتتىق قورعاۋ ورگاندارى جانە مەملەكەتتىك فەلدەگەرلىك قىزمەتى قىزمەتكەرلەرىنىڭ ادەپ كودەكسىنە» تيەسىلى.

قاراپايىم ەتيكا نورماسىن ەلەمەي، جۋرناليستەرگە ءتىل تيگىزە، ادامنىڭ ار-نامىسىنا تيەتىن ءسوز ايتقان ادام باس پروكۋراتۋرا بەدەلىنە نۇقسان كەلتىرسە دە ەسكەرتۋمەن قۇتىلعانى جەڭىل دەپ ەسەپتەيدى مەديا قاۋىمداستىق. قوعامدى تىكسىنتكەن، پروكۋراتۋرا قۇرىلىمىنداعى مامانداردىڭ كاسىبيلىگىنە كۇمان تۋدىرعان پروكۋرور دورەكى ارەكەتىنە كەشىرىم سۇراماعان.

بيلىك ازاماتتىق بەلسەندىلەر مەن وپپوزيتسيا وكىلدەرىن «جەكە ادامنىڭ ار-نامىسى مەن قادىر-قاسيەتىنە ءتىل تيگىزدى» دەگەن ايىپپەن ءجيى جاۋاپقا تارتادى. الايدا باس پروكۋراتۋرا قىزمەتكەرىنىڭ قورلاۋ ءماندى سوزىنە ۇجىمدىق ارىز تۇسسە دە لايىق جاۋاپكەرشىلىككە تارتىلماۋى اقوردا ۋادە ەتكەن «ادىلەتتى جانە جاڭا قازاقستاننىڭ» جۋىردا ورنايتىنىنا قوعامدىق سەنىمدى تومەندەتەدى دەيدى ساراپشىلار.

The Qazaq Times