Öskemende "Dorojnıy kontrol'" aqparat portalınıñ tilşisi Anton Knyazevti wrıp ketken. Bwl jöninde "Ädil söz" baspasöz qorğau qorı habarladı dep jazdı Ortalıq Aziya jañalıqtar qızmeti.

"3 tamızda Öskemende belgisiz bes adam "Dorojnıy kontrol'" aqparat portalınıñ tilşisi Anton Knyazevti wrıp ketken. Bwl jöninde aqparat äleumettik jelide tarağannan keyin Şığıs Qazaqstan oblısı policiya departamenti Qılmıstıq kodekstiñ 293-bap 2-böligi 1-tarmağı boyınşa ("Bwzaqılıq") sotqa deyingi tergeu amaldarın bastağanın, eki küdikti anıqtalğanın jäne qajetti tergeu şaraları jürgizilip jatqanın habarladı" dep jazılğan qor habarlamasında.

"Dorojnıy kontrol'" portalındağı aqparatqa qarağanda, Anton Knyazev 3 tamızğa qarağan tüni qaladağı dükenderdiñ birinde soqqığa jığılğan. Şabuıldauşılar jurnalistiñ betinen wrıp qana qoymay, tilşiniñ köligin de büldirgen. Jurnalistiñ şaqıruımen oqiğa ornına policiya qızmetkerleri kelse de, "jas jigitter bilik ökilderin elemey, jurnaliske qatıstı zañğa qayşı äreketterin jalğastıra bergen".

Şığıs Qazaqstan oblısı policiya departamentiniñ habarlauınşa, oqiğağa baylanıstı 1994 jäne 1999 jılğı eki jigit küdikti retinde anıqtalğan.

Anton Knyazev oqiğanıñ käsibi mindetine qatısı bar-joğın aytpağan.

20 şildede Atırauda "Dorojnıy kontrol'" portalınıñ qızmetkeri Olesya Vertinskayanı üyiniñ mañında wrıp ketken edi. Sol kezde de policiya oqiğanı "Bwzaqılıq" babı boyınşa tergep jatqanın mälimdegen. Al jurnalistiñ özi oqiğanı käsibi qızmetimen baylanıstırğan.

"Meniñ oyımşa, osınıñ bäri qañtardağı meni azaptau men Atırauda äskeri borışın ötegen aqtaulıq soldat Medet Amangeldimen baylanıstı siyaqtı" degen edi şilde soñında Olesya Virtinskaya qor ökilderine.

Olesya Vertinskaya aqpan ayında atıraulıq "Aqjayıq" basılımına Qañtar oqiğası kezinde "käsibi mindetin atqarğanı üşin wstalğanın, policeylerdiñ onı tergep, qoqan-loqı körsetip, qol jwmsağanın" aytqan. Sol kezde onıñ üstinen "beybit jiındı ötkizu tärtibin bwzu" babı boyınşa äkimşilik hattama toltırılğan. Keyin qwqıq bwzu qwramı bolmağandıqtan is toqtatılğan.