وسكەمەندە "دوروجنىي كونترول" اقپارات پورتالىنىڭ ءتىلشىسى انتون كنيازەۆتى ۇرىپ كەتكەن. بۇل جونىندە ء"ادىل ءسوز" ءباسپاسوز قورعاۋ قورى حابارلادى دەپ جازدى ورتالىق ازيا جاڭالىقتار قىزمەتى.

"3 تامىزدا وسكەمەندە بەلگىسىز بەس ادام "دوروجنىي كونترول" اقپارات پورتالىنىڭ ءتىلشىسى انتون كنيازەۆتى ۇرىپ كەتكەن. بۇل جونىندە اقپارات الەۋمەتتىك جەلىدە تاراعاننان كەيىن شىعىس قازاقستان وبلىسى پوليتسيا دەپارتامەنتى قىلمىستىق كودەكستىڭ 293-باپ 2-بولىگى 1-تارماعى بويىنشا ("بۇزاقىلىق") سوتقا دەيىنگى تەرگەۋ امالدارىن باستاعانىن، ەكى كۇدىكتى انىقتالعانىن جانە قاجەتتى تەرگەۋ شارالارى جۇرگىزىلىپ جاتقانىن حابارلادى" دەپ جازىلعان قور حابارلاماسىندا.

"دوروجنىي كونترول" پورتالىنداعى اقپاراتقا قاراعاندا، انتون كنيازەۆ 3 تامىزعا قاراعان ءتۇنى قالاداعى دۇكەندەردىڭ بىرىندە سوققىعا جىعىلعان. شابۋىلداۋشىلار ءجۋرناليستىڭ بەتىنەن ۇرىپ قانا قويماي، ءتىلشىنىڭ كولىگىن دە بۇلدىرگەن. ءجۋرناليستىڭ شاقىرۋىمەن وقيعا ورنىنا پوليتسيا قىزمەتكەرلەرى كەلسە دە، "جاس جىگىتتەر بيلىك وكىلدەرىن ەلەمەي، جۋرناليسكە قاتىستى زاڭعا قايشى ارەكەتتەرىن جالعاستىرا بەرگەن".

شىعىس قازاقستان وبلىسى پوليتسيا دەپارتامەنتىنىڭ حابارلاۋىنشا، وقيعاعا بايلانىستى 1994 جانە 1999 جىلعى ەكى جىگىت كۇدىكتى رەتىندە انىقتالعان.

انتون كنيازەۆ وقيعانىڭ كاسىبي مىندەتىنە قاتىسى بار-جوعىن ايتپاعان.

20 شىلدەدە اتىراۋدا "دوروجنىي كونترول" پورتالىنىڭ قىزمەتكەرى ولەسيا ۆەرتينسكايانى ءۇيىنىڭ ماڭىندا ۇرىپ كەتكەن ەدى. سول كەزدە دە پوليتسيا وقيعانى "بۇزاقىلىق" بابى بويىنشا تەرگەپ جاتقانىن مالىمدەگەن. ال ءجۋرناليستىڭ ءوزى وقيعانى كاسىبي قىزمەتىمەن بايلانىستىرعان.

"مەنىڭ ويىمشا، وسىنىڭ ءبارى قاڭتارداعى مەنى ازاپتاۋ مەن اتىراۋدا اسكەري بورىشىن وتەگەن اقتاۋلىق سولدات مەدەت امانگەلدىمەن بايلانىستى سياقتى" دەگەن ەدى شىلدە سوڭىندا ولەسيا ۆيرتينسكايا قور وكىلدەرىنە.

ولەسيا ۆەرتينسكايا اقپان ايىندا اتىراۋلىق "اقجايىق" باسىلىمىنا قاڭتار وقيعاسى كەزىندە "كاسىبي مىندەتىن اتقارعانى ءۇشىن ۇستالعانىن، پوليتسەيلەردىڭ ونى تەرگەپ، قوقان-لوقى كورسەتىپ، قول جۇمساعانىن" ايتقان. سول كەزدە ونىڭ ۇستىنەن "بەيبىت جيىندى وتكىزۋ ءتارتىبىن بۇزۋ" بابى بويىنشا اكىمشىلىك حاتتاما تولتىرىلعان. كەيىن قۇقىق بۇزۋ قۇرامى بولماعاندىقتان ءىس توقتاتىلعان.