Foto: aşıq derekközden

Qazaqstanda qañtar oqiğasına baylanıstı qozğalğan ister 700-ge juıqtadı. Bas prokurordıñ ağa kömekşisi Azamat Serğazin seysenbi küngi brifing kezinde 695 is boyınşa sotqa deyingi tergeu amaldarı jürip jatqanın habarladı. Bwl turalı Ortalıq Aziya jañalıqtar qızmeti jazdı.

"Auır jäne asa auır qılmıs boyınşa 695 is boyınşa sotqa deyingi tergeu amaldarı bastalğan: 44-i – terrorizm, 15-i – adam öltiru, 6-sı ügit-nasihat jäne bilikti basıp aluğa şaqıru faktisi. Küdikti retinde 780 adam wstalğan, 695-in qamauğa sot sankciya bergen" dedi Serğazin.

Bwğan deyin Bas prokuratura 546 is boyınşa tergeu jürip jatqanın aytqan. Vedomstvo "negizsiz wstalğan" 100 adamnıñ bosatılğanın aytqan.

Vedomstvo mälimetinşe, qañtar oqiğasına baylanıstı elde 8 354 äkimşilik is qaralğan: 3 337 adamğa eskertu berilgen, 1653 is boyınşa ayıppwl salınğan, 1002 adam qamalğan. Olardıñ jazasın jwmsartu boyınşa 1758 apellyaciyalıq şağım tüsirilgen. 676 adam qamaudan bosatılğan.

Qwqıq qorğauşılardıñ aytuınşa, qaza bolğan nemese iz-tüzsiz joğalğan nemese wstalğandar arasında qılmısqa qatısı joq beybit azamattar bar. Jergilikti jäne halıqaralıq qwqıq qorğauşılar bilikti beybit şeruge ğana qatısqan, pikirin aytu qwqığın jüzege asırğısı kelgen azamattardı qudalamauğa, olardı dereu bosatuğa şaqırğan.