قاڭتار وقيعاسى بويىنشا 695 ءىس قوزعالدى

"اۋىر جانە اسا اۋىر قىلمىس بويىنشا 695 ءىس بويىنشا سوتقا دەيىنگى تەرگەۋ امالدارى باستالعان: 44-ءى – تەرروريزم، 15-ءى – ادام ءولتىرۋ، 6-سى ۇگىت-ناسيحات جانە بيلىكتى باسىپ الۋعا شاقىرۋ فاكتىسى. كۇدىكتى رەتىندە 780 ادام ۇستالعان، 695-ءىن قاماۋعا سوت سانكتسيا بەرگەن" دەدى سەرعازين.

بۇعان دەيىن باس پروكۋراتۋرا 546 ءىس بويىنشا تەرگەۋ ءجۇرىپ جاتقانىن ايتقان. ۆەدومستۆو "نەگىزسىز ۇستالعان" 100 ادامنىڭ بوساتىلعانىن ايتقان.

ۆەدومستۆو مالىمەتىنشە، قاڭتار وقيعاسىنا بايلانىستى ەلدە 8 354 اكىمشىلىك ءىس قارالعان: 3 337 ادامعا ەسكەرتۋ بەرىلگەن، 1653 ءىس بويىنشا ايىپپۇل سالىنعان، 1002 ادام قامالعان. ولاردىڭ جازاسىن جۇمسارتۋ بويىنشا 1758 اپەللياتسيالىق شاعىم تۇسىرىلگەن. 676 ادام قاماۋدان بوساتىلعان.

قۇقىق قورعاۋشىلاردىڭ ايتۋىنشا، قازا بولعان نەمەسە ءىز-ءتۇزسىز جوعالعان نەمەسە ۇستالعاندار اراسىندا قىلمىسقا قاتىسى جوق بەيبىت ازاماتتار بار. جەرگىلىكتى جانە حالىقارالىق قۇقىق قورعاۋشىلار بيلىكتى بەيبىت شەرۋگە عانا قاتىسقان، پىكىرىن ايتۋ قۇقىعىن جۇزەگە اسىرعىسى كەلگەن ازاماتتاردى قۋدالاماۋعا، ولاردى دەرەۋ بوساتۋعا شاقىرعان.