Eko-belsendiler sammit delegattarınıñ qwramın qayta qaraudı swrauda. Foto: "Anadolı" agenttigi

Jahandıq klimat mäselesin talqılap jatqan COP26 sammiti delegattarınıñ qwramına baylanıstı küdikti jaytter aşıqqa şıqtı. Jer şarı men adamzattıñ wzaq bolaşağı üşin qazıp alınatın energiya közderinen bas tartuğa türtki boladı dep kütilgen jiınğa, kerisinşe  däl osı qazıp alınatın janar zat industriyasına qatıstı twlğalar köbirek qatısıp jatqanı belgili boldı.

Bwnday jayttı anıqtap şıqqan Global Witness wyımınıñ belsendileri qazba energiya közi arqılı kapital toptağan adamdar sammittiñ qorıtındısına eleuli keri äser etedi dep alañdap otır. Olardıñ anıqtağan mälimetinşe, qazba energiya közderi industriyasına baylanısı bar 503 adam klimat sammitine qatısıp otır.

Global Witness  wyımı belsendileriniñ aytuınşa,  mwnay-gaz, kömir sekildi qazıp alınatın energiya közderi salasındağı iri korporaciyalar, olar qoldağan iri sayasatkerler 25 jıldan beri BWW-nıñ klimat özgerisine qatıstı kelissözderin nätijesiz etip keledi.  «Qazba energiya közderi industriyası klimat özgerisin joqqa şığarıp, osı boyınşa qabıldanatın mañızı şaralardı on jıldap artqa şegindirip keledi. Sondıqtan da klimat mäselesi ülken problemağa aynalıp ketip otır», – deydi Global Witness wyımınıñ ökili Myurrey Vorzi.

Jahandıq ortaq problemanı talqılap jatqan sammitke jalpı 190-ğa juıq elden  40 mıñğa juıq delegat qatısuda. Olardıñ qatarında 479 delegat jibergen Braziliya köş bastap twr.

Global Witness, Corporate Accountability sekildi halıqaralıq wyımdardıñ jürgeizgen bağalauına say, sammit barısında Kanada men Resey ökilderi qazba energiya közderiniñ klimat özgerisindegi ıqpal-äserin köbirek joqqa şığarıp otır. Sonday-aq, sandardıñ salıstırması körsetkendey 500-den astam qazba energiya öndirisine qatıstı delegattar soñğı 20 jılda osı energiya közderinen köbirek klimatı bwzılğan 8 eldiñ delegattarınan köp. Sonday-aq, bwl sammitke atalğan salada käsiporındarı bar 100-den astam kompaniya jäne 30-dan astam birlesken wyımdar qatısıp otır.

Qorşağan ortanı qorğau wyımdarı, eko-belsendileri sammittegi delegattar qwramın qayta qaraudı ötiniş etude. Olardıñ pikirinşe kezekti sammitte klimat özgerisine baylanıstı sındarlı şaralar qabıldanbasa, kelesi on jıldıqtar klimattıñ oñaltu şaralarına tım keş boluı mümkin.

The Qazaq Times