Almatı älemdegi eñ las qalalar qatırınan körine bastadı. Foto: Kazakhstan Today

Jahandıq klimat mäselesin talqılap jatqan COP26 sammitinde 196 memleket pen halıqaralıq wyım kömir paydalanudan bas tartuğa uäde berdi. Olardıñ arasında 40 memleket kömir paydalanudı toqtatu boyınşa mindetteme alsa, 18 memleket kömir arqılı energiya aluğa investiciyanı toqtatu boyınşa kelisimge qol qoydı.

Kömir arqılı alınan energiyanı investiciyalaudı toqtatu kelisimine Pol'şa, Çili jäne V'etnam sekildi energiya öndirisinde kömirdi birşama köbirek paydalanatın elderde bar. Alayda, bwl salada kömir eñ köp paydalanatın Australiya, AQŞ, Qıtay jäne Ündistan sekildi elder kelisimge qol qoymadı.

Britan ükimetiniñ mälimdemesine qarağanda, damığan elder 2030 jılı birtindep kömirden bas tartuğa, al damuşı elder 2040 jılı osınday mindetti orındauğa kelisken.

«Älem dwrıs bağıtqa bara jatır, kömirdiñ tağdırı şeşilu aldında twr. Taza energiyağa süyengen bolaşaq qwru üşin ekologiyalıq jäne ekonomikalıq artıqşılıqtardı paydalanatın bolamız», – dedi Britannıñ biznes jäne energetika ministri Kvasi Kvarten.

Atalımış, COP26 sammitiniñ auanınan bayqağanımızday, bolaşaqta Batıstıñ damığan elderi bas bolıp qazıp alınatın energiya közderinen tolıqtay bas tartuğa alıp kelmek. Bwl degenimiz birtindep mwnay men tabiği gazdan bas tartu bastamalarınıñ kezek kütip twrğanın körsetedi.

Jıl basında Britan jerindegi kömir arqılı elektr energiyasın öndiretin soñğı staciya joyıldı. Bwl tarihi oqiğanı bizdiñ qoğam onşa elep eskergen joq. Qazir, bayqap otırğanımızday, Britaniya jasıl energiyağa ötu boyınşa köş bastap twr. Jel, kün, teñiz jäne özen köp sularınan elektr energiyasın öndiruge ağılşın memleketi jıl sayın investiciyanı arttırıp keledi. Bwl ekonomikası mwnayğa, qarjı salası Resey sekildi älimjettikke üyrengen körşige baylanğan Qazaqstan üşin dabıl bolıp qağılıp otır.

The Qazaq Times