جاھاندىق كليمات ماسەلەسىن تالقىلاپ جاتقان COP26 ءسامميتى دەلەگاتتارىنىڭ قۇرامىنا بايلانىستى كۇدىكتى جايتتەر اشىققا شىقتى. جەر شارى مەن ادامزاتتىڭ ۇزاق بولاشاعى ءۇشىن قازىپ الىناتىن ەنەرگيا كوزدەرىنەن باس تارتۋعا تۇرتكى بولادى دەپ كۇتىلگەن جيىنعا، كەرىسىنشە  دال وسى قازىپ الىناتىن جانار زات يندۋسترياسىنا قاتىستى تۇلعالار كوبىرەك قاتىسىپ جاتقانى بەلگىلى بولدى.

بۇنداي جايتتى انىقتاپ شىققان Global Witness ۇيىمىنىڭ بەلسەندىلەرى قازبا ەنەرگيا كوزى ارقىلى كاپيتال توپتاعان ادامدار ءسامميتتىڭ قورىتىندىسىنا ەلەۋلى كەرى اسەر ەتەدى دەپ الاڭداپ وتىر. ولاردىڭ انىقتاعان مالىمەتىنشە، قازبا ەنەرگيا كوزدەرى يندۋسترياسىنا بايلانىسى بار 503 ادام كليمات سامميتىنە قاتىسىپ وتىر.

Global Witness  ۇيىمى بەلسەندىلەرىنىڭ ايتۋىنشا،  مۇناي-گاز، كومىر سەكىلدى قازىپ الىناتىن ەنەرگيا كوزدەرى سالاسىنداعى ءىرى كورپوراتسيالار، ولار قولداعان ءىرى ساياساتكەرلەر 25 جىلدان بەرى بۇۇ-نىڭ كليمات وزگەرىسىنە قاتىستى كەلىسسوزدەرىن ناتيجەسىز ەتىپ كەلەدى.  «قازبا ەنەرگيا كوزدەرى يندۋسترياسى كليمات وزگەرىسىن جوققا شىعارىپ، وسى بويىنشا قابىلداناتىن ماڭىزى شارالاردى ون جىلداپ ارتقا شەگىندىرىپ كەلەدى. سوندىقتان دا كليمات ماسەلەسى ۇلكەن پروبلەماعا اينالىپ كەتىپ وتىر»، – دەيدى Global Witness ۇيىمىنىڭ وكىلى ميۋررەي ۆورزي.

جاھاندىق ورتاق پروبلەمانى تالقىلاپ جاتقان سامميتكە جالپى 190-عا جۋىق ەلدەن  40 مىڭعا جۋىق دەلەگات قاتىسۋدا. ولاردىڭ قاتارىندا 479 دەلەگات جىبەرگەن برازيليا كوش باستاپ تۇر.

Global Witness, Corporate Accountability سەكىلدى حالىقارالىق ۇيىمداردىڭ جۇرگەىزگەن باعالاۋىنا ساي، سامميت بارىسىندا كانادا مەن رەسەي وكىلدەرى قازبا ەنەرگيا كوزدەرىنىڭ كليمات وزگەرىسىندەگى ىقپال-اسەرىن كوبىرەك جوققا شىعارىپ وتىر. سونداي-اق، سانداردىڭ سالىستىرماسى كورسەتكەندەي 500-دەن استام قازبا ەنەرگيا وندىرىسىنە قاتىستى دەلەگاتتار سوڭعى 20 جىلدا وسى ەنەرگيا كوزدەرىنەن كوبىرەك كليماتى بۇزىلعان 8 ەلدىڭ دەلەگاتتارىنان كوپ. سونداي-اق، بۇل سامميتكە اتالعان سالادا كاسىپورىندارى بار 100-دەن استام كومپانيا جانە 30-دان استام بىرلەسكەن ۇيىمدار قاتىسىپ وتىر.

قورشاعان ورتانى قورعاۋ ۇيىمدارى، ەكو-بەلسەندىلەرى سامميتتەگى دەلەگاتتار قۇرامىن قايتا قاراۋدى ءوتىنىش ەتۋدە. ولاردىڭ پىكىرىنشە كەزەكتى سامميتتە كليمات وزگەرىسىنە بايلانىستى سىندارلى شارالار قابىلدانباسا، كەلەسى ون جىلدىقتار كليماتتىڭ وڭالتۋ شارالارىنا تىم كەش بولۋى مۇمكىن.

The Qazaq Times