EP delegaciyasınıñ jetekşisi Tayuan prezidentimen kezdesti. Foto: VOA

Qıtaydıñ Tayuanğa (Tayvan') qaratqan qısımı küşeyip twrğan twsta Europarlament Tayuanğa alğaş ret resmi delegaciyasın jiberdi.  Taybeyge saparlay bardı. Tipti, Europa Odağı Tayuanğa tiisti qoldau körsetetin bildirgen delegaciya jetekşisi «Sizder jalğız emessizder» dep ketti.

Keşe, Europarlamenttegi Demokratiyalıq üderisterge sırtqı aralasudı zertteytin arnayı komitet delegaciyası Tayuan prezidenti Cay Yıñ Vın hanımmen kezdesti. Kezdesude prezident Cay Europarlamentten kelgen alğaşqı delegaciyanıñ saparı asa mañızdı mänge ie ekenin atap ötti.

Delegaciya jetekşisi Franciyanıñ Europalıq Parlamenttegi müşesi Rafael' Glyuksman Cay hanımğa: «Biz mwnda öte qarapayım jäne öte ayqın habarmen keldik – sizder jalğız emessizder, Europa sizdermen birge», – degen pikirin jetkizdi.

Beyjiñ biligi Tayuandı «Ülken Qıtay» qwramına biriktiretin bir provinciya retinde qarastıradı. Osı negizde Taybeydi diplomatiyalıq oqşaulau üşin  öziniñ quattı ekonomikalıq, äskeri jäne diplomatiyalıq küşin paydalanıp keledi tolassız qısım tüsirip keledi. Biraq, Tayuan bar küşin salıp öziniñ sırt älemmen diplomatiyalıq baylanıstarın saqtap qaluğa tırısuda.

Tayuanğa resmi delegaciya jiberui EO men Qıtay qatınasınıñ qazirgi jağdayın ayqındaytın körsetkiş. Ötken ayda Europarlament alğaş ret «EO-Tayuan sayasi qarım-qatınastarı men ıntımaqtastığı» bayandamasın qabıldap, Tayuanmen qarım-qatınasın jaqsartudı, sonıñ işinde Tayuannıñ Europadağı «Ekonomikalıq jäne sauda keñsesin» «EO-Tayuan keñsesi» dep özgertudi jäne eki jaqtı ıntımaqtastıqtı bastaudı wsındı. Bwl investiciyalıq kelisimderge de jol aşatın mañızdı qwjat retinde bağalandı.

Ärine, Europalıq Parlamenttik Tayuanğa delegaciya jiberui Beyjiñniñ qitığına tieri sözssiz. Qıtay SİM tarabı birden reakciya tanıtıp, «Europarlamenttiñ äreketi halıqaralıq qatınastardıñ negizgi normaların, «bir Qıtay principin» öreskel bwzdı jäne Europalıq Odaqtıñ Tayuan mäselesine qatıstı qoğamdıq mindettemelerine qayşılıq jasadı. Bwl ärekettiñ sipatı men keltiretin äseri öte naşar boladı», – dep mälimdedi.  Äri, Qıtay tarabı Europarlamentiniñ bwl äreketine «tübegeyli qarsı ekenin» ayttı.

The Qazaq Times