AQŞ-tıñ Auğanstan isteri boyınşa arnayı ökili. Foto: United States Institute of Peace

AQŞ-tıñ Auğanstan isteri boyınşa arnayı ökili Zalmay Kalizat qızmetinen ketti. Ol bwğan deyin AQŞ pen «Taliban» ortasındağı kelissözderdi alıp barğan bolatın.

AQŞ memlekettik hatşısı Antoni Blinken Auğanstan isteri boyınşa arnayı ökil bolıp Kalizattıñ orınbasarı Tomas Vesttiñ kelgenin mälimdegen. Bwrınğı arnayı ökildiñ wzaq uaqıttıñ jürgizgen kelissözderi nätijesiz boldı dep bağalanuda, sebebi, AQŞ äskerleri Auğanstannan şığa salısımen el biligin tälipter basıp aldı.

Mälimetterge qarağanda Kalizat memlekettik hatşığa jazğan hatında auğan ükimeti men «Taliban» arasındağı sayasi kelisim «kütpegen nätije bergenin» moyındağan. «Bwnıñ septeri köp, ol turalı oylarımdı jaqınğı künderde bildiremin», – degen Zalmay Kalizat öz hatında. Ol sonday-aq, auğan halqı tap bolğan jağday üşin qayğıratının da bildirgen eken.

Düysenbide Blinken Zalmay Kalizattıñ qızmetten ketkenin mälimdey otırıp: «Men onıñ Amerika eline ondağan jıl etken eñbegi üşin rizaşılığımdı bildiremin», – dedi.

Kişi Buş keinen beri AQŞ-tıñ Auğanstan mäselesi boyınşa arnayı ökili qızmetin atqarıp kelgen Auğanstan tuması Zalmay Kalizat biıl 70 jasta. Qwrama Ştattardıñ ardager diplomattarınıñ biri sanaladı.  Bıltır qañtarda Doha qalasında AQŞ pen «Taliban» ortasında kelisimge qol qoyuşınıñ biri.

The Qazaq Times