قازۇۋ قالاشىعىنىڭ كىرەبەرىس اركاسى. فوتو: mdp.kaznu.kz

ءال-فارابي اتىنداعى قازۇۋ جاريالاعان كامپۋس اۋماعىنا 10,9 ملرد تەڭگە قارجىعا قىزمەت كورسەتۋ جونىندەگى داۋلى مەملەكەتتىك ساتىپ الۋ حابارلاندىرۋى بەلگىلەنگەن مەرزىمدە ىسكە اسپادى, ۋاقىتشا توقتاتىلعان بولۋى ىقتيمال.

7 قازاندا الماتى قالاسى بويىنشا ىشكى مەملەكەتتىك اۋديت دەپارتامەنتى كامەرالدى باقىلاۋ كەزىندە انىقتالعان بۇزۋشىلىقتاردى جويۋ تۋرالى نۇسقاما بەرگەن. حابارلاندىرۋدا «ۋاكىلەتتى ورگانداردىڭ شەشىمىنە ساي» كونكۋرستى بولدىرماۋ تۋرالى كورسەتىلگەن.

اقپاراتقا قاراعاندا، دەپارتامەنتتىڭ كامەرالدى باقىلاۋ ءبولىمىنىڭ باس مامانى جامپوز بۋكەنوۆ بايقاۋدى ۇيىمداستىرۋشىنىڭ قۇجاتتاماعا بىلىكتىلىك تالاپتارى مەن شارتتارىن بەلگىلەۋ كەزىندە مەملەكەتتىك ساتىپ الۋ تۋرالى زاڭنامانى بۇزعانىن انىقتاعان.

اتاپ ايتقاندا، «مەملەكەتتىك ساتىپ الۋ تۋرالى» زاڭعا سايكەس، ساتىپ الۋدى ۇيىمداستىرۋشى كونكۋرس قۇجاتتاماسىن قازاق جانە ورىس تىلدەرىندە ازىرلەيدى.

«ساتىپ الۋدى زەرتتەۋ ارقىلى تەحنيكالىق ەرەكشەلىكتە ورنالاستىرىلعان اقپارات تەك ورىس تىلىندە عانا ازىرلەنگەنى انىقتالدى، بۇل رەتتە مەملەكەتتىك تىلدە اقپارات جوق»، – دەلىنگەن حابارلامادا.

ساتىپ الىناتىن قىزمەتتەر مەن تاۋارلار مۇگەدەكتەر قاۋىمداستىعىنىڭ تىزبەسىمەن بەكىتىلگەن.

«الايدا ۇيىمداستىرۋشى حابارلاندىرۋدا ساتىپ الۋ تەك قانا رەسپۋبليكا مۇگەدەكتەرىنىڭ قوعامدىق بىرلەستىكتەرى مەن سول قب قۇرعان ۇيىمدار اراسىندا وتكىزىلەتىنى كورسەتىلمەگەن»، – دەلىنگەن قۇجاتتا.

انىقتالعان بۇزۋشىلىقتاردى تۇزەتۋ تۋرالى ەسكەرتۋدى جوو 10 جۇمىس كۇنى ىشىندە ورىنداۋعا ءتيىس. ولاي بولماعان جاعدايدا مەملەكەتتىك اۋديت ۋاكىلەتتى ورگانعا قارسىلىق جىبەرە الادى.

44 نىسانعا ءتۇرلى باعىتتا كەشەندى قىزمەت كورسەتۋگە ارنالعان قوماقتى تەندەر قوعام نازارىن اۋدارىپ، وعان ءبىر توپ وقىتۋشى-پروفەسسور نارازىلىق تانىتقان. ولار ۇلتتىق ۋنيۆەرسيتەتتىڭ بۇل ارەكەتىن «قارجى جىمقىرۋ پيعىلىنان تۋعان ايلا» دەپ اتاعان.

The Qazaq Times