Jarılıstan keyin qoyılğan blok-beket. Jambıl oblısı, Bayzaq audanı. 27 tamız 2021 jıl. Foto: QT/ Kültegin Aspanwlı

Tamız ayında Jambıl oblısı Bayzaq audanındağı jarılıs kezinde aqparat taratqan tilşiler jauap aluğa şaqırılğan qılmıstıq is «qılmıs qwramı bolmağandıqtan» toqtatıladı. Bwl jöninde oblıstıq policiyanıñ baspasöz hatşısı mindetin atqaruşı Begman Qwtmırzaev Azattıq radiosına habarladı.

«Qılmıstıq qwramı joq bolğandıqtan toqtatıladı. Biraq äzirge bazağa engizilgen joq. Engen kezde istiñ toqtağanı jöninde resmi türde habarlaymız» degen ol basılımğa.

Bwğan deyin Jambıl policiyası tamızdıñ soñında äskeri qoymada bolğan jarılıs kezinde tarağan aqparatqa baylanıstı «Körineu jalğan aqparat taratu» babı boyınşa is qozğalğanın habarlağan. Kuä retinde Turaninfo.kz aqparat agenttiginiñ tilşisi Islambek Dastan, al qorğanuğa qwqığı bar kuä retinde 7 arnanıñ tilşisi Daniyar Älimqwl şaqırılğan.

Äleumettik jelide jarılıstan aqparat taratıp, käsibi mindetin atqarğan jurnalisterdiñ tergeluine qoldanuşılar aşulı reakciya bildirgen. Keybir aqparatqa qarağanda, jurnalist «bir käsipkerdiñ üyinde üyilip jatqan snaryadtar mañınan» aqparat taratqan. İske osı jayt türtki boluı mümkin.

Oqiğağa reakciya bildirgen Aqparat jäne qoğamdıq damu ministri Aida Balaeva Azattıqqa «mäsele neden tuındadı, ne üşin onı jauapqa tartıp jatqanın anıqtaymız, kömek körsetemiz» degen edi.

26 tamızda Jambıl oblısı Bayzaq audanınıñ äskeri bölimindegi qoymada oq-däriler jarılıp, artı örtke wlasqan. Jarılıstan keyin äskeri qoymağa jaqın auıldardan jüzdegen adam evakuaciyalanğan. 17 adam qaza taptı. Olardıñ 10-ı - azamattıq qorğanıs, altauı – qorğanıs ministrligi, bireui – äskeri prokuratura qızmetkeri. Tağı bir adam izdestirilip jatır. Oqiğağa baylanıstı Qılmıstıq kodekstiñ 462-babı («Qaru-jaraq, sonday-aq aynaladağılarğa qauip töndiretin zattarmen jwmıs isteu qağidaların bwzu») boyınşa qılmıstıq is qozğalğan.

The Qazaq Times