جامبىلدا جۋرناليستەر شاقىرىلعان قىلمىستىق ءىس جابىلادى

تامىز ايىندا جامبىل وبلىسى بايزاق اۋدانىنداعى جارىلىس كەزىندە اقپارات تاراتقان تىلشىلەر جاۋاپ الۋعا شاقىرىلعان قىلمىستىق ءىس «قىلمىس قۇرامى بولماعاندىقتان» توقتاتىلادى. بۇل جونىندە وبلىستىق پوليتسيانىڭ ءباسپاسوز حاتشىسى مىندەتىن اتقارۋشى بەگمان قۇتمىرزاەۆ ازاتتىق راديوسىنا حابارلادى.

«قىلمىستىق قۇرامى جوق بولعاندىقتان توقتاتىلادى. بىراق ازىرگە بازاعا ەنگىزىلگەن جوق. ەنگەن كەزدە ءىستىڭ توقتاعانى جونىندە رەسمي تۇردە حابارلايمىز» دەگەن ول باسىلىمعا.

بۇعان دەيىن جامبىل پوليتسياسى تامىزدىڭ سوڭىندا اسكەري قويمادا بولعان جارىلىس كەزىندە تاراعان اقپاراتقا بايلانىستى «كورىنەۋ جالعان اقپارات تاراتۋ» بابى بويىنشا ءىس قوزعالعانىن حابارلاعان. كۋا رەتىندە Turaninfo.kz اقپارات اگەنتتىگىنىڭ ءتىلشىسى يسلامبەك داستان، ال قورعانۋعا قۇقىعى بار كۋا رەتىندە 7 ارنانىڭ ءتىلشىسى دانيار الىمقۇل شاقىرىلعان.

الەۋمەتتىك جەلىدە جارىلىستان اقپارات تاراتىپ، كاسىبي مىندەتىن اتقارعان جۋرناليستەردىڭ تەرگەلۋىنە قولدانۋشىلار اشۋلى رەاكتسيا بىلدىرگەن. كەيبىر اقپاراتقا قاراعاندا، جۋرناليست «ءبىر كاسىپكەردىڭ ۇيىندە ءۇيىلىپ جاتقان سناريادتار ماڭىنان» اقپارات تاراتقان. ىسكە وسى جايت تۇرتكى بولۋى مۇمكىن.

وقيعاعا رەاكتسيا بىلدىرگەن اقپارات جانە قوعامدىق دامۋ ءمينيسترى ايدا بالاەۆا ازاتتىققا «ماسەلە نەدەن تۋىندادى، نە ءۇشىن ونى جاۋاپقا تارتىپ جاتقانىن انىقتايمىز، كومەك كورسەتەمىز» دەگەن ەدى.

26 تامىزدا جامبىل وبلىسى بايزاق اۋدانىنىڭ اسكەري بولىمىندەگى قويمادا وق-دارىلەر جارىلىپ، ارتى ورتكە ۇلاسقان. جارىلىستان كەيىن اسكەري قويماعا جاقىن اۋىلداردان جۇزدەگەن ادام ەۆاكۋاتسيالانعان. 17 ادام قازا تاپتى. ولاردىڭ 10-ى - ازاماتتىق قورعانىس، التاۋى – قورعانىس مينيسترلىگى، بىرەۋى – اسكەري پروكۋراتۋرا قىزمەتكەرى. تاعى ءبىر ادام ىزدەستىرىلىپ جاتىر. وقيعاعا بايلانىستى قىلمىستىق كودەكستىڭ 462-بابى («قارۋ-جاراق, سونداي-اق اينالاداعىلارعا قءاۋىپ تءوندىرەتىن زاتتارمەن جۇمىس ىستەۋ قاعيدالارىن بۇزۋ») بويىنشا قىلمىستىق ءىس قوزعالعان.

The Qazaq Times