Qazaqstannıñ bas sanitar-därigeri Erlan Qiyasov auruhanalarda foto jäne beynetüsirilimge qoyılğan şekteulerdi alıp tastadı. 17 qırküyekte qol qoyılğan qaulı bügin küşine endi.

Qoğam narazılığın tudırğan, belsendiler adam qwqığın bwzıp-zañdı qaqtığıstarğa jol beredi dep sınağan norma küşin joydı. Bwdan bılay pacientter qwqıqtarı bwzılğan jağdayda därigerlerdiñ is-äreketin kamerağa taspalauğa haqılı.

Osığan deyin qoldanılıp kelgen «Densaulıq saqtau wyımdarında, jedel medicinalıq järdem köliginde, jergilikti atqaruşı organdar karantin üşin ayqındağan üy-jaylarda pacientter men medicina qızmetkerleriniñ kelisiminsiz audio-, foto- jäne beynetüsirilim jürgizudi, sonday-aq medicina qızmetkerleriniñ üyde medicinalıq kömek körsetui, oşaqta epidemiologiyalıq tekseru jürgizu, nauqastar men baylanısta bolğandarğa saualnama jürgizu kezinde şekteu» turalı tarmaq alınıp tastaldı.

Densaulıq saqtau wyımdarında foto jäne video tüsirilimge tıyım 2020 jıldıñ säuirinde pandemiya bastalğannan keyin birden payda bolğan. Densaulıq saqtau ministrligi mwnı äleumettik jelilerde därigerlerdiñ teris imidjin qalıptastırmas üşin jäne BAQ betteri men internette medicinağa qatıstı jağımsız aqparattı azaytuğa kerek boldı dep tüsindirgen.

Bwdan basqa, COVID-19 anıqtalğan nauqaspen baylanısta bolğan adamdar (tığız baylanıs) vakcinaciyanıñ tolıq kursın almağan bolsa, eki apta boyı üyde oqşaulanadı. Al ekpe alğandarğa mamannıñ qabıldauına barıp qaralu jetkilikti bolmaq. Koronavirus anıqtalğan sırqatpen baylanısta bolğan mwnday adamdardan auru belgileri bayqalmağan jağdayda üy karantinine oqşaulanbaydı, tipti endi osığan deyin memleket esebinen jasalıp kelgen COVID-19-ğa zerthanalıq tekseru jürgizilmeydi. Bekitilgen maman telefon arqılı 14 kün onıñ jağdayın baqılap otıratın boladı. Simptom bayqalğan boyda PTR testin tapsırıp, onıñ qorıtındısı dayın bolğanşa üy karantininde otıruğa mindetteledi.

The Qazaq Times