قازاقستاننىڭ باس سانيتار-دارىگەرى ەرلان قياسوۆ اۋرۋحانالاردا فوتو جانە بەينەتۇسىرىلىمگە قويىلعان شەكتەۋلەردى الىپ تاستادى. 17 قىركۇيەكتە قول قويىلعان قاۋلى بۇگىن كۇشىنە ەندى.

قوعام نارازىلىعىن تۋدىرعان، بەلسەندىلەر ادام قۇقىعىن بۇزىپ-زاڭدى قاقتىعىستارعا جول بەرەدى دەپ سىناعان نورما كۇشىن جويدى. بۇدان بىلاي پاتسيەنتتەر قۇقىقتارى بۇزىلعان جاعدايدا دارىگەرلەردىڭ ءىس-ارەكەتىن كامەراعا تاسپالاۋعا حاقىلى.

وسىعان دەيىن قولدانىلىپ كەلگەن «دەنساۋلىق ساقتاۋ ۇيىمدارىندا، جەدەل مەديتسينالىق جاردەم كولىگىندە، جەرگىلىكتى اتقارۋشى ورگاندار كارانتين ءۇشىن ايقىنداعان ءۇي-جايلاردا پاتسيەنتتەر مەن مەديتسينا قىزمەتكەرلەرىنىڭ كەلىسىمىنسىز اۋديو-, فوتو- جانە بەينەتۇسىرىلىم جۇرگىزۋدى، سونداي-اق مەديتسينا قىزمەتكەرلەرىنىڭ ۇيدە مەديتسينالىق كومەك كورسەتۋى، وشاقتا ەپيدەميولوگيالىق تەكسەرۋ جۇرگىزۋ، ناۋقاستار مەن بايلانىستا بولعاندارعا ساۋالناما جۇرگىزۋ كەزىندە شەكتەۋ» تۋرالى تارماق الىنىپ تاستالدى.

دەنساۋلىق ساقتاۋ ۇيىمدارىندا فوتو جانە ۆيدەو تۇسىرىلىمگە تىيىم 2020 جىلدىڭ ساۋىرىندە پاندەميا باستالعاننان كەيىن بىردەن پايدا بولعان. دەنساۋلىق ساقتاۋ مينيسترلىگى مۇنى الەۋمەتتىك جەلىلەردە دارىگەرلەردىڭ تەرىس ءيميدجىن قالىپتاستىرماس ءۇشىن جانە باق بەتتەرى مەن ينتەرنەتتە مەديتسيناعا قاتىستى جاعىمسىز اقپاراتتى ازايتۋعا كەرەك بولدى دەپ تۇسىندىرگەن.

بۇدان باسقا، COVID-19 انىقتالعان ناۋقاسپەن بايلانىستا بولعان ادامدار (تىعىز بايلانىس) ۆاكتسيناتسيانىڭ تولىق كۋرسىن الماعان بولسا، ەكى اپتا بويى ۇيدە وقشاۋلانادى. ال ەكپە العاندارعا ماماننىڭ قابىلداۋىنا بارىپ قارالۋ جەتكىلىكتى بولماق. كوروناۆيرۋس انىقتالعان سىرقاتپەن بايلانىستا بولعان مۇنداي ادامداردان اۋرۋ بەلگىلەرى بايقالماعان جاعدايدا ءۇي كارانتينىنە وقشاۋلانبايدى، ءتىپتى ەندى وسىعان دەيىن مەملەكەت ەسەبىنەن جاسالىپ كەلگەن COVID-19-عا زەرتحانالىق تەكسەرۋ جۇرگىزىلمەيدى. بەكىتىلگەن مامان تەلەفون ارقىلى 14 كۇن ونىڭ جاعدايىن باقىلاپ وتىراتىن بولادى. سيمپتوم بايقالعان بويدا پتر تەستىن تاپسىرىپ، ونىڭ قورىتىندىسى دايىن بولعانشا ءۇي كارانتينىندە وتىرۋعا مىندەتتەلەدى.

The Qazaq Times