2020 jıldıñ 6 mausımında oppoziciyalıq küşterdiñ şaqıruımen ötken sayasi beybit şeru kezinde dezinfekciyalau jwmıstarı ädetten tıs küşeygen. Foto: QT

Almatıda beybit mitingke tıyım salınuı mümkin. Bwl turalı seysenbi küngi brifingte Almatı qalasınıñ bas sanitar-därigeri Jandarbek Bekşin mälimdedi.

Basqarma basşısı koronavirus infekciyasınıñ örşuine baylanıstı beybit jinalıstarğa tıyım saludı qarastırıp jatqanın jetkizdi.

«Qırküyek ayında beybit mitinge rwqsat berilgen edi. Äleumettik qaşıqtıqtı saqtay otırıp dezinfekciya qwraldarın qoldanu arqılı mitingiler ötkizildi. Ol kezde auru qalıptı deñgeyde edi. Biraq qazir jağday özgerude. Soğan baylanıstı miting şaraların şekteu qarastırılıp jatır», – dedi ol.

Onıñ aytuınşa, sauda alañdarınıñ jwmıs istep twrğanı «halıqqa da, memleket üşin de paydalı». Bwl nısandarda koronavirus jwqtıru qaupi sanitarlıq talaptardı saqtauğa baylanıstı ekenin aytadı. Sonday-aq, epidemiyanıñ küzgi tolqını qarsañında 10 adamnan artıq adamnıñ toptasuına da tıyım salınadı.

Pandemiya bastalar twsta bası dauğa qalıp, şeni memlekettik bas sanitar-därigerinen qalalıq deñgeyge tömendegen Jandarbek Bekşin sayasi nauqan qıza bastağan şaqta eki ay bwrınğı beybit jiındarğa bağa bere bastadı. Tipti jurnalister men blogerlerdiñ toptasıp jüruin Borodino şayqasına teñedi.

Bwğan deyin «Ar.Ruh.Haq» qoğamdıq qorınıñ prezidenti Baqıtjan Töreğojina men Liberty qorınıñ prezidenti, qwqıq qorğauşı Ğalım Ağeleuov birigip, Almatı äkimdiginen 31 qırküyek küni miting ötkizuge rwqsat berilgenin habarlağan. Jiın «sayasi reforma jürgizu jäne sayasi sebeppen qudalaudı toqtatu» taqırıbında miting ötkizgisi keletinin mälimdep, jergilikti atqaru organına ötkizgen üşinşi ötinişinen keyin ğana rwqsat alğan. 500 adamğa arnalğan beybit şeru jaqındağan twsta bilik erekşe şeşim qabıldap jatır. Kinoteatr men teatr jwmısına rwqsat berip, biraq azamattıq qoğamnıñ talap jiının ötkizuine tosqauıl qoymaq.

“The Qazaq Times”