Koronavirustan emdeuge arnalğan stacionardıñ birindegi reanimaciya bölimi. Foto: Almatı qalası äkimdiginiñ baspasöz qızmeti

Şeneunikter Almatıda koronavirus pandemiyasınıñ törtinşi tolqını birşama bäseñdegenin aytadı. Qazir stacionarlarda şamamen 43,1% orın tolğan. 

Qoğamdıq densaulıq saqtau basqarmasınıñ mälimetinşe, ötken täulikte, 8 qırküyekte 976 adam tirkelgen. Bwl seysenbige qarağanda 65 keyske artıq. Jalpı qalada sıyımdılığı 7740 orın bolatın infekciyalıq stacionarlarda 3669 adam emdelu üstinde.  Al reanimaciya jäne qarqındı terapiya bölimderinde 331 nauqas jatır.

Almatıdağı epidemiologiyalıq jağdaydıñ twraqtaluına baylanıstı 5 qalalıq stacionar öziniñ negizgi profili boyınşa jwmısın jalğastıradı. Bwl turalı Almatı qalalıq Qoğamdıq densaulıq basqarmasınıñ basşısı Nariman Tabınbaev Öñirlik kommunikaciyalar qızmetinde ötken brifing barısında ayttı.

«Qazir jağday birtindep tüzele bastadı, auruhanağa tüsentinderdiñ jüktemesi de birşama twraqtalıp keledi. Sondıqtan keybir auruhanalar josparlı jwmıs rejimine oralıp, qalıptı jağdayda qızmet körsetetin boladı. Osılayşa, qalalıq Revmatologiya ortalığı, Teri-venerologiyalıq dispanseri, B.O.Jarbosınov atındağı Urologiya ğılımi ortalığı, «HAK Medikal» klinikalıq auruhanası, «Astana International» qonaqüyi koronavirustıq emdeu bağıtınan bas tartıp, negizgi jwmısın bastadı», – dep habarladı Tabınbaev.

Redakciya qol jetkizgen resmi aqparatqa säykes, uaqıtşa kovidtik stacionar retinde jwmıs istegen medicina wyımdarı men qonaq üylerdiñ tizimi:

  • «B. Jarbosınov atındağı ğılımi urologiya ortalığı» – 150;
  • «HAK Medical» klinikalıq stacionarı – 150;
  • «Astana International» qonaq üyi – 240;
  • «Shera Park» qonaq üyi – 600;
  • «Teri-venerologiyalıq dispanseri» – 30;
  • «Qalalıq revmatologiyalıq ortalığı» – 80;
  • «Grand Erbil» qonaq üyi – 150;
  • «Astra» qonaq üyi – 160 tösek-orın.

Äzirge stacionarlarda dezinfekciyalau şarası jürgizilip jatır. Sonımen qosa, basqarma basşısı Halyk Arena sport keşeni särsenbiden bastap tolıq bosatılıp, rezervke qoyılğanın aytadı. Kelesi aptada qalalıq Kardiologiya ortalığı, Jedel şwğıl kömek körsetu auruhanası (JŞKKA) jäne Qorğanıs ministrliginiñ Äskeri-klinikalıq gospitali koronavirustan emdeudi toqtatıp, negizgi jwmısın bastaydı. Epidahual jaqsarğan sayın infekciyalıq tösek-orın kölemi qısqara beredi.

 «Eger on kün bwrın täuligine 700-den astam nauqas qalalıq auruhanalarğa jatqızılğan bolsa, qazir bwl san 378 nauqasqa deyin tömendedi. 454 adam auruhanadan şığarıldı. Üyde baqılanatın nauqastar sanı da qısqardı – 14 200-den 7 446-ğa deyin. Bügingi tañda auruhanalarda 3669 nauqas emdelip jatır, tösek-orındardıñ tolımdılıq deñgeyi – 43,1%», – dep tolıqtırdı Tabınbaev.

Resmi derekke qarağanda, Almatı qalasında biıl aqpannan beri 900 mıñğa tarta adam ekpeniñ alğaşqı, onıñ işinde 780 mıñdayı tolıq dozasın alğan. Äkimdik mälimetinşe, äzirge 160 egu punkti men 237 egu brigadasında 1028 medqızmetker jwmıs isteydi.

Jalpı pandemiya bastalğalı qalada 162 mıñnan asa adam auırğan, onıñ 50 mıñğa juığı tamızda anıqtalğan. Qazir respublikada anıqtalğan kündelikti eseptiñ keminde şirek böligi Almatı qalasına tiesili bolıp otır.

Epidahualdıñ naşarlauına baylanıstı tamızda qalıptı jağdayda qoldanılıp jürgen 7011 tösek-orın 8910-ğa deyin köbeytilgen. Seysenbi bwl 7740 orınğa deyin qısqartıldı.

The Qazaq Times