شەنەۋنىكتەر الماتىدا كوروناۆيرۋس پاندەمياسىنىڭ ءتورتىنشى تولقىنى ءبىرشاما باسەڭدەگەنىن ايتادى. قازىر ستاتسيونارلاردا شامامەن 43,1% ورىن تولعان. 

قوعامدىق دەنساۋلىق ساقتاۋ باسقارماسىنىڭ مالىمەتىنشە، وتكەن تاۋلىكتە، 8 قىركۇيەكتە 976 ادام تىركەلگەن. بۇل سەيسەنبىگە قاراعاندا 65 كەيسكە ارتىق. جالپى قالادا سىيىمدىلىعى 7740 ورىن بولاتىن ينفەكتسيالىق ستاتسيونارلاردا 3669 ادام ەمدەلۋ ۇستىندە.  ال رەانيماتسيا جانە قارقىندى تەراپيا بولىمدەرىندە 331 ناۋقاس جاتىر.

الماتىداعى ەپيدەميولوگيالىق جاعدايدىڭ تۇراقتالۋىنا بايلانىستى 5 قالالىق ستاتسيونار ءوزىنىڭ نەگىزگى ءپروفيلى بويىنشا جۇمىسىن جالعاستىرادى. بۇل تۋرالى الماتى قالالىق قوعامدىق دەنساۋلىق باسقارماسىنىڭ باسشىسى ناريمان تابىنباەۆ وڭىرلىك كوممۋنيكاتسيالار قىزمەتىندە وتكەن بريفينگ بارىسىندا ايتتى.

«قازىر جاعداي بىرتىندەپ تۇزەلە باستادى، اۋرۋحاناعا تۇسەنتىندەردىڭ جۇكتەمەسى دە ءبىرشاما تۇراقتالىپ كەلەدى. سوندىقتان كەيبىر اۋرۋحانالار جوسپارلى جۇمىس رەجيمىنە ورالىپ، قالىپتى جاعدايدا قىزمەت كورسەتەتىن بولادى. وسىلايشا، قالالىق رەۆماتولوگيا ورتالىعى، تەرى-ۆەنەرولوگيالىق ديسپانسەرى، ب.و.جاربوسىنوۆ اتىنداعى ۋرولوگيا عىلىمي ورتالىعى، «حاك مەديكال» كلينيكالىق اۋرۋحاناسى، «Astana International» قوناقۇيى كوروناۆيرۋستىق ەمدەۋ باعىتىنان باس تارتىپ، نەگىزگى جۇمىسىن باستادى»، – دەپ حابارلادى تابىنباەۆ.

رەداكتسيا قول جەتكىزگەن رەسمي اقپاراتقا سايكەس، ۋاقىتشا كوۆيدتىك ستاتسيونار رەتىندە جۇمىس ىستەگەن مەديتسينا ۇيىمدارى مەن قوناق ۇيلەردىڭ ءتىزىمى:

  • «ب. جاربوسىنوۆ اتىنداعى عىلىمي ۋرولوگيا ورتالىعى» – 150;
  • «HAK Medical» كلينيكالىق ستاتسيونارى – 150;
  • «Astana International» قوناق ءۇيى – 240;
  • «Shera Park» قوناق ءۇيى – 600;
  • «تەرى-ۆەنەرولوگيالىق ديسپانسەرى» – 30;
  • «قالالىق رەۆماتولوگيالىق ورتالىعى» – 80;
  • «Grand Erbil» قوناق ءۇيى – 150;
  • «Astra» قوناق ءۇيى – 160 توسەك-ورىن.

ازىرگە ستاتسيونارلاردا دەزينفەكتسيالاۋ شاراسى جۇرگىزىلىپ جاتىر. سونىمەن قوسا، باسقارما باسشىسى Halyk Arena سپورت كەشەنى سارسەنبىدەن باستاپ تولىق بوساتىلىپ، رەزەرۆكە قويىلعانىن ايتادى. كەلەسى اپتادا قالالىق كارديولوگيا ورتالىعى، جەدەل شۇعىل كومەك كورسەتۋ اۋرۋحاناسى (جشككا) جانە قورعانىس مينيسترلىگىنىڭ اسكەري-كلينيكالىق گوسپيتالى كوروناۆيرۋستان ەمدەۋدى توقتاتىپ، نەگىزگى جۇمىسىن باستايدى. ەپيداحۋال جاقسارعان سايىن ينفەكتسيالىق توسەك-ورىن كولەمى قىسقارا بەرەدى.

 «ەگەر ون كۇن بۇرىن تاۋلىگىنە 700-دەن استام ناۋقاس قالالىق اۋرۋحانالارعا جاتقىزىلعان بولسا، قازىر بۇل سان 378 ناۋقاسقا دەيىن تومەندەدى. 454 ادام اۋرۋحانادان شىعارىلدى. ۇيدە باقىلاناتىن ناۋقاستار سانى دا قىسقاردى – 14 200-دەن 7 446-عا دەيىن. بۇگىنگى تاڭدا اۋرۋحانالاردا 3669 ناۋقاس ەمدەلىپ جاتىر، توسەك-ورىنداردىڭ تولىمدىلىق دەڭگەيى – 43,1%»، – دەپ تولىقتىردى تابىنباەۆ.

رەسمي دەرەككە قاراعاندا، الماتى قالاسىندا بيىل اقپاننان بەرى 900 مىڭعا تارتا ادام ەكپەنىڭ العاشقى، ونىڭ ىشىندە 780 مىڭدايى تولىق دوزاسىن العان. اكىمدىك مالىمەتىنشە، ازىرگە 160 ەگۋ پۋنكتى مەن 237 ەگۋ بريگاداسىندا 1028 مەدقىزمەتكەر جۇمىس ىستەيدى.

جالپى پاندەميا باستالعالى قالادا 162 مىڭنان اسا ادام اۋىرعان، ونىڭ 50 مىڭعا جۋىعى تامىزدا انىقتالعان. قازىر رەسپۋبليكادا انىقتالعان كۇندەلىكتى ەسەپتىڭ كەمىندە شيرەك بولىگى الماتى قالاسىنا تيەسىلى بولىپ وتىر.

ەپيداحۋالدىڭ ناشارلاۋىنا بايلانىستى تامىزدا قالىپتى جاعدايدا قولدانىلىپ جۇرگەن 7011 توسەك-ورىن 8910-عا دەيىن كوبەيتىلگەن. سەيسەنبى بۇل 7740 ورىنعا دەيىن قىسقارتىلدى.

The Qazaq Times