Livan ortalıq qalasında qaqtığıstan 6 adam qaza taptı. Foto: BBC

Livan ortalığı Beyrut qalasındağı ükimetke qarsı narazılıq akciyası atısqa wlastı. 6 adam qaza tauıp, 30-dan astam adam jaraqat aldı. Qarulı qaqtığıs şiit mwsılman toptarınıñ qarsılıq şarası kezinde bolğanı aytıluda.

Bıltır Beyrut portındağı jarılıs, pandemiya, eldegi wzaq uaqıtqa sozılğan äleumettik dağdarıs köpten beri ükimetke qarsı narazılıqtı küşeytip keldi. El azamattarı bwğan deyin de ükimtti korrupciyamen ayıptap beybit narazılıq şaralarında ötkizgen.

Bwl jolı eldegi «Hizbulla» jäne «Amal» qatarlı şiittik mwsılman toptardıñ narazılığında oq atılıp, soñı qarulı qaqtığısqa wlasqan. Atalğan şiittik toptar bıltırğı jarılısqa qatıstı sottıñ şeşimi men tergeu-tekseru amaldarına narazı. Livan sotı jarılısqa eldegi şiittik toptardıñ da qatısı bar degen küdikterdi qarastırğan bolatın.

Keşegi qaqtığısqa qatıstı «Hizbulla» tarabı mälimdeme jasap, Livan qarulı küşterindegi hristian snayperleri jinalğandarğa qarata oq atqanın ayttı. Alayda, Livan küşteri bwl mälimetti teristedi. Degenmen, osınıñ özi qaqtığıstıñ sipatın dini alauızdıqqa qaray bwrıp otır.

Äleumettik jelilerge tarağan video jazbalar men suretterden taraptardıñ kezektese oq atısıp, köşe-köşelerde jauaptasqan wrıs bolğanın köruge boladı. Sırt eldiñ sarapşıları men otandıq birqatar täuelsiz sarapşılar da bwl jağdaydıñ Süriya dağdarısına alıp kelgen qaqtığıstarğa qattı wqsaytının aytuda. Aldağı uaqıtta Livanda twraqsızdıq ornauı mümkni degen boljamdar da joq emes.

The Qazaq Times