Ötken küni elde anıqtalğan sırqattardıñ 28%-ı Almatı qalasınan

Almatıda koronavirus pandemiyasınıñ törtinşi tolqını äli bäseñdemey twr. Tap qazir qalanıñ 13 mıñğa tarta twrğını emdelip jatır. Qazir rezervtegi tösek-orındardı qosa eseptegende stacionarlarda şamamen 49,7% orın tolğan. Bwl tamız ayınıñ ortasına qarağanda birşama kemigeni.

Qoğamdıq densaulıq saqtau basqarmasınıñ mälimetinşe, ötken täulikte, 5 qırküyekte tirkelgen 1085 adamnıñ 1050-i simptom belgilerimen, tağı 35 adam simptomsız tirkelgen. Jeksenbi küni 273 adam auruhanağa jatqızılğan. Bwl özge aylardağı körsetkişten äldeqayda joğarı.

Jalpı qalada sıyımdılığı 8910 orın bolatın infekciyalıq stacionarlarda 4435 adam emdelip jatır. Olardıñ arasında 122 bala tösekke tañılğan. Al reanimaciya jäne qarqındı terapiya bölimderinde 388 nauqas jatır. 56 adam ÖJJ, 150 nauqas invazivti emes ÖJJ-ımen jäne 192 sırqat High flow apparatımen tınıstap jatır. Sonday-aq, BMSK men Telemedicina ortalığınıñ mobil'di toptarımen birge üy jağdayında 8640 nauqas ambulatorlıq deñgeyde baqılauğa alınğan.

Senbide jiını 15 adam koronavirus pen oğan wqsas pnevmoniyadan qaytıs bolğan.

Resmi derekke qarağanda, Almatı qalasında biıl aqpannan beri 887 mıñ adam ekpeniñ alğaşqı, onıñ işinde 761 mıñı tolıq dozasın alğan. Äkimdik mälimetinşe, äzirge 160 egu punkti men 237 egu brigadasında 1028 medqızmetker jwmıs isteydi.

Jalpı pandemiya bastalğalı qalada 159,5 mıñnan asa adam auırğan, onıñ 40 mıñğa juığı tamızda anıqtalğan. Qazir respublikada anıqtalğan kündelikti eseptiñ keminde şirek böligi Almatı qalasına tiesili bolıp otır.

Epidahualdıñ naşarlauına baylanıstı qalıptı jağdayda qoldanılıp jürgen 7011 tösek-orın 8910-ğa deyin köbeytilgen. Stacionarlardağı orın sanı artıp, tipti jaña rezervtik filialdar uaqıtşa iske qosılğan.

Osığan deyin bas sanitar däriger Jandarbek Bekşin bir künde auruhanağa jatqızılğandar sanı 500-den assa, qalada lokdaun küşeytilip, blok-beket qoyılatını turalı naurız ayındağı kriteriydiñ qazir küşin joyğanın mälimdegen.

The Qazaq Times