Infekciya oşağın zalalsızdandıratın mamandar. Foto: Almatı garnizonınıñ baspasöz qızmeti

Qazaqstanda koronavirus pen oğan wqsas pnevmoniyağa şaldıqqandar sanı tağı 6,3 mıñğa artıp, jalpı esebi 811 mıñnan astı. Tek şilde ayında 154 mıñ adam sırqattanıp, 1932 adam (KVI+ 1644, KVI- 288) qaytıs bolğan. Şilde ayınıñ ortasına qaray täuliktik sırqattar sanı 5 mıñnıñ, tamızğa qaray 7 mıñnıñ üstine şıqqan indettiñ törtinşi tolqını qazir 6 mıñğa tüsiñkiredi. Tamız ayınıñ özinde sırqattanğan 169,5 mıñ adam anıqtaldı jäne 2872 adam köz jwmdı.

Densaulıq saqtau ministrliginiñ resmi mälimetinşe, elde 22 tamızda koronavirus (KVI+) jwqqan 6314 adam, al 21-i küni  koronavirus pnevmoniyasına (KVI-) şaldıqqan 27 adam tirkeldi jäne senbide 137 qazaqstandıq aurudan qaytıs boldı. Qazir elde 125 mıñday adam (KVI+ boyınşa 119 mıñ, KVI- boyınşa 5,8 mıñ) auırıp jatır.

#COVID Ötken küni PTR testi arqılı koronavirus jwqqanı rastalğan nauqastar qatarı tağı arttı. Olardıñ basım böligi ädettegidey mıñ şaqtı keystik dinamikada twrğan Almatı (1615) qalası jäne Qarağandı (913) oblısınan. Bwdan özge astana (650), Almatı (408),  Aqtöbe (382), Pavlodar (320), Atırau (310) öñirlerinde epidahual äli de naşar küyde.  Qostanay (291), Aqmola (278), Mañğıstau (219), Jambıl (191),  SQO (159), ŞQO (158), Şımkent (147), Qızılorda (124), BQO (93), Türkistan (56) oblıstarında dert qarqını birşama bäseñdegen. Keşe, jeksenbide aurudan ayıqqan 5097 adam üyine şığarılğan. 21 tamızda jiını 113 adam qaytıs bolğan.

#COVID_pnevmoniyası Tamızdıñ 21-i aqparatı bir täulikke keşigip beriletin koronavirus pnevmoniyasına şaldıqqan 27 nauqas esepke alındı. Vedomstvo dereginşe, senbi küni sırqattar Almatı (9) jäne Jambıl (4), oblıstarı, astanada (4) köptep anıqtalğan. Sonımen qosa, 9 adam ayığıp şıqqan, tağı 24 adam köz jwmğan.

#Jalpı  DenMin deregine qarağanda, emdelip jatqan 122 mıñnan asa nauqastıñ 30 mıñı auruhanada, 94 mıñı ambulatorlıq baqılauda. 1944 nauqastıñ jağdayı naşar, ondağı 518 adamnıñ häli öte auır. Bwdan özge 312 sırqat ökpeni jasandı jeldetu apparatımen tınıstap jatır.

Epidkartada «jasıl aymaqtağı» Türkistan oblısınan basqa öñirdiñ bäri twtastay «qızıl aymaqta» twr.

DenMin habarınşa, 11 naurız ben 12 şilde aralığında PTR testi oñ körsetken 1311 sınama sekvenirlengen (ştamm türin anıqtaytın taldau). Säykesinşe, biıl köktem-jazda genomdıq zertteu nätijesinde eldiñ basım böliginen virustıñ braziliyalıq, britandıq, oñtüstikafrikalıq jäne ündistandıq ştamdarı anıqtalğan.

Bıltır 13 naurızdan beri COVID-19 infekciyasın jwqtırğandar qatarı 743 mıñnan, 1 tamızdan bılayğı koronavirus pnevmoniyası 67 mıñnan asqan. DDSW derekqorı men Wlttıq statistikada Qazaqstanda auırğandar sanı 811 mıñğa jetti. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardan 15,2 mıñ adam (KVI+ / U07.1 – 8415, KVI- / U07.2 – 4240, ilespe aurulardan – 2633) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazaqstan virus taraluı boyınşa älemde Djons Hopkins universiteti jäne DDSW tizimindegi 221 el men aymaqtıñ arasında 41-orınğa ornıqtı.

Ükimettiñ soñğı deregine qarağanda, Qazaqstanda 5 mln adam koronavirusqa qarsı vakcinanı tolıq alğan, al keminde birinşi dozası egilgen jwrttıñ sanı 6,3 mln-nan asadı.

The Qazaq Times