ينفەكتسيا وشاعىن زالالسىزداندىراتىن ماماندار. فوتو: الماتى گارنيزونىنىڭ ءباسپاسوز قىزمەتى

قازاقستاندا كوروناۆيرۋس پەن وعان ۇقساس پنەۆمونياعا شالدىققاندار سانى تاعى 6,3 مىڭعا ارتىپ، جالپى ەسەبى 811 مىڭنان استى. تەك شىلدە ايىندا 154 مىڭ ادام سىرقاتتانىپ، 1932 ادام (كۆي+ 1644, كۆي- 288) قايتىس بولعان. شىلدە ايىنىڭ ورتاسىنا قاراي تاۋلىكتىك سىرقاتتار سانى 5 مىڭنىڭ، تامىزعا قاراي 7 مىڭنىڭ ۇستىنە شىققان ىندەتتىڭ ءتورتىنشى تولقىنى قازىر 6 مىڭعا تۇسىڭكىرەدى. تامىز ايىنىڭ وزىندە سىرقاتتانعان 169,5 مىڭ ادام انىقتالدى جانە 2872 ادام كوز جۇمدى.

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 22 تامىزدا كوروناۆيرۋس (كۆي+) جۇققان 6314 ادام، ال 21-ءى كۇنى  كوروناۆيرۋس پنەۆمونياسىنا (كۆي-) شالدىققان 27 ادام تىركەلدى جانە سەنبىدە 137 قازاقستاندىق اۋرۋدان قايتىس بولدى. قازىر ەلدە 125 مىڭداي ادام (كۆي+ بويىنشا 119 مىڭ، كۆي- بويىنشا 5,8 مىڭ) اۋىرىپ جاتىر.

#COVID وتكەن كۇنى پتر تەستى ارقىلى كوروناۆيرۋس جۇققانى راستالعان ناۋقاستار قاتارى تاعى ارتتى. ولاردىڭ باسىم بولىگى ادەتتەگىدەي مىڭ شاقتى كەيستىك ديناميكادا تۇرعان الماتى (1615) قالاسى جانە قاراعاندى (913) وبلىسىنان. بۇدان وزگە استانا (650), الماتى (408),  اقتوبە (382), پاۆلودار (320), اتىراۋ (310) وڭىرلەرىندە ەپيداحۋال ءالى دە ناشار كۇيدە.  قوستاناي (291), اقمولا (278), ماڭعىستاۋ (219), جامبىل (191),  سقو (159), شقو (158), شىمكەنت (147), قىزىلوردا (124), بقو (93), تۇركىستان (56) وبلىستارىندا دەرت قارقىنى ءبىرشاما باسەڭدەگەن. كەشە، جەكسەنبىدە اۋرۋدان ايىققان 5097 ادام ۇيىنە شىعارىلعان. 21 تامىزدا جيىنى 113 ادام قايتىس بولعان.

#COVID_پنەۆمونياسى تامىزدىڭ 21-ءى اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 27 ناۋقاس ەسەپكە الىندى. ۆەدومستۆو دەرەگىنشە، سەنبى كۇنى سىرقاتتار الماتى (9) جانە جامبىل (4), وبلىستارى، استانادا (4) كوپتەپ انىقتالعان. سونىمەن قوسا، 9 ادام ايىعىپ شىققان، تاعى 24 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 122 مىڭنان اسا ناۋقاستىڭ 30 مىڭى اۋرۋحانادا، 94 مىڭى امبۋلاتورلىق باقىلاۋدا. 1944 ناۋقاستىڭ جاعدايى ناشار، ونداعى 518 ادامنىڭ ءحالى وتە اۋىر. بۇدان وزگە 312 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

ەپيدكارتادا «جاسىل ايماقتاعى» تۇركىستان وبلىسىنان باسقا ءوڭىردىڭ ءبارى تۇتاستاي «قىزىل ايماقتا» تۇر.

دەنمين حابارىنشا, 11 ناۋرىز بەن 12 شىلدە ارالىعىندا پتر تەستى وڭ كورسەتكەن 1311 سىناما سەكۆەنيرلەنگەن (شتامم ءتۇرىن انىقتايتىن تالداۋ). سايكەسىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق جانە ۇندىستاندىق شتامدارى انىقتالعان.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 743 مىڭنان، 1 تامىزدان بىلايعى كوروناۆيرۋس پنەۆمونياسى 67 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 811 مىڭعا جەتتى. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردان 15,2 مىڭ ادام (كۆي+ / U07.1 – 8415, كۆي- / U07.2 – 4240, ىلەسپە اۋرۋلاردان – 2633) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 41-ورىنعا ورنىقتى.

ۇكىمەتتىڭ سوڭعى دەرەگىنە قاراعاندا، قازاقستاندا 5 ملن ادام كوروناۆيرۋسقا قارسى ۆاكتسينانى تولىق العان، ال كەمىندە ءبىرىنشى دوزاسى ەگىلگەن جۇرتتىڭ سانى 6,3 ملن-نان اسادى.

The Qazaq Times