"Auğanstan bolaşağı". Foto: Aşıq derekközderden.

Auğanstanda şekara aymaqtar men iri qalalardı birinen keyin birin özine qaratqan tälipter ortalıq qala Kabulğa şabuıl qoydı. Qalağa kiretin mañızdı jol ötkelderi qısqa ğana şabuıldardan keyin "Talibannıñ" baqılauına ötti. Elde bilik almasatını aydan anıq boldı. Tipti, prezident Aşraf Ğanidıñ elden şığıp ketkeni turalı da aqparat taradı. 

Aşraf Ğanidıñ prezident sarayın tastap ketkeni turalı aqparattı Reseydiñ Auğanstandağı elşiligi habarlağan. Özge de birneşe aqparat qwraldarı bwl turalı öz aqparat közderine süyene otırıp habarladı. Degenmen, prezident Ğanidiñ öziniñ elden şığıp ketkeni turalı resmi mälimet bergen joq.

Tälipterdiñ qarulı küşteri Kabulğa lap qoyğanda ortalıq qalada abır-sabır bastalıp ketti. Elden şığıp ketuge mümkindigi bolmağandar bas qalanı tastap jan-jaqqa ağılıp jatqanı turalı aqparattar bügin tüsten bwrın birqatar şeteldik aqparat qwraldarında tarağan edi.

Osı twsta "Taliban" wyımınıñ resmi ökili Yalda Hakim resmi mälimdeme taratıp,  eşqanday "kek alu" äreketi bolmaytının aytıp auğanstandıqtardı, Kabul twrğındarın äbigerge tüspeuge şaqırğan. "Biz auğan halqın, onıñ işinde Kabul jwrtınınıñ bas amandığı men mal-mülkiniñ amandığına kepildik beretinimizdi aytqımız keledi. Eşkimnen öş almaymız", – degen ol mälimdemesinde. Sonday-aq "Taliban" ökili: "Jetekşilerimiz qarulı küşterge qalağa kirmey Kabuıldıñ sırtında twrudı bwyırdı. Biz biliktiñ tınıştıqpen ötkerilip beriluin qalaymız", – degen.

Auğanstan İşki ister ministrliginiñ resmi mälimdemesinde de biliktiñ tınış ötkerilip beriletini aytılıp qoydı. Sonımen, Auğanstanda jaña ükimet bilikke kelmek. Bwl eldi şariğat jolımen basqarıp, islamdıq memleket qwrğısı keletin "Taliban Islam qozğalısınan" qwrıladı.

Auğanstandağı bwl özgeris addağı uaqıtta Orta Aziyadağı geosayasi jağdaydı tübegeyli özgertip jiberui de ğajap emes. Scenariydiñ bwlay damuı öñirdiñ tınıştığı men qauipsizdigine ülken qorqınıştardı da, sonday-aq jaña mümkindikterdi de alıp kelui mümkin.

The Qazaq Times