الماتى وبلىسىنىڭ سىبايلاس جەمقورلىققا قارسى قىزمەت دەپارتامەنتى تالدىقورعان قالاسى اكىمىنىڭ الەۋمەتتىك سالاعان جاۋاپتى ورىنباسارى قاراماعىنداعى قىزمەتكەرلەرى ءبىراز ۋاقىت جەمقورلىقپەن اينالىسقانى اشكەرە بولعان سوڭ لاۋازىمىنان بوساعانىن حابارلادى.
قازىر دەپارتامەنتتىڭ تەرگەۋ باسقارماسى تالدىقورعان قالاسى اكىمدىگىنىڭ كاسىپكەرلىك ءبولىمىنىڭ باسشىسىنا جانە باس مامانىنا قاتىستى ءىستى تەرگەپ جاتىر. ولار قىلمىستىق كودەكسىنىڭ 366-بابى بويىنشا پارا الدى دەگەن كۇدىككە ىلىنگەن. بۇل قىزمەتكەرلەر اكىم ورىنباسارى ساۋلە ارزانبەكوۆا قاراماعىندا بولعان.
تاعىلعان ايىپقا قاراعاندا، ءبولىم باستىعى وزىنە باعىنىشتى باس مامانمەن سىبايلاسىپ، كارانتين شەكتەۋى كەزىندە بۇقارالىق ءىس-شارالاردى وتكىزۋگە تىيىم سالىنعانىنا قاراماستان، مەيرامحانا يەلەرىنەن جانە كوشەدەگى ساۋدا-ساتتىق نۇكتەلەرىنەن 20 مىڭ مەن 270 مىڭ تەڭگە كولەمدە تۇراقتى تۇردە پارا الىپ وتىرعان.
بۇدان وزگە تاعى 5 مەيرامحانانىڭ اكىمشىسى دە پارا بەرگەنى ءۇشىن قىلمىستىق جاۋاپكەرشىلىككە تارتىلىپ وتىر.
وسى قىلمىستىق ءىس نەگىزىندە الماتى وبلىستىق سىبايلاس جەمقورلىققا قارسى ءىس-قيمىل دەپارتامەنتىنىڭ باسشىلىعى قالا اكىمىنىڭ قاتىسۋىمەن كەڭەس وتكىزدى.
ونىڭ ناتيجەسى بويىنشا قىزمەتكەرلەرىنىڭ بارماق باستى، كوز قىستى ارەكەتىن باقىلاي الماعانى ءۇشىن تالدىقورعان قالاسى اكىمىنىڭ ورىنباسارى ساۋلە ارزانبەكوۆا جۇمىستان بوساتىلدى.
2019 جىلعى 10 جەلتوقساندا قايتا قارالعان «قر مەملەكەتتىك قىزمەتى تۋرالى» زاڭعا سايكەس:
«ورتالىق مەملەكەتتىك ورگان باسشىلارىنىڭ ورىنباسارلارى – ءوزى جەتەكشىلىك ەتەتىن ۆەدومستۆونىڭ، دەربەس قۇرىلىمدىق بولىمشەنىڭ باسشىسى سىبايلاس جەمقورلىق قىلمىس جاساعان كەزدە وتستاۆكاعا بەرۋى كەرەك».
بۇل اقپاراتتى تالدىقورعان اكىمدىگىنىڭ ءباسپاسوز قىزمەتى راستادى.
«ارزانبەكوۆا شىنىمەن مەملەكەتتىك قىزمەتتەن بوساتىلدى. ول ءوز ەركىمەن اكىم ورىنباسارى قىزمەتىنەن كەتۋ تۋرالى ءوتىنىش جازدى. وعان ءوزى جەتەكشىلىك ەتكەن مونيتورينگتىك توپ مۇشەلەرىنىڭ ۇستالۋى نەگىز بولدى»، – دەپ ناقتىلادى اكىمدىكتىڭ باسپاسوز حاتشىسى نۇر قاناتۇلى.
46 جاستاعى ساۋلە ارزانبەكوۆا 28 جىلدىق ەڭبەك ءوتىلىنىڭ كەيىنگى ءۇش جىلىن اكىم ورىنباسارى قىزمەتىندە وتكەرگەن. ەڭبەك جولىن تالدىقورعان قالاسى اكىمى اپپاراتىنىڭ حاتشىسى بولىپ باستاعان. سودان بەرى اكىم اپپاراتىنىڭ ءبولىم مامانى، ىشكى ساياسات ءبولىمىنىڭ جەتەكشى مامانى، قالالىق ىشكى ساياسات ءبولىمىنىڭ باس مامانى، اكىم اپپاراتىنىڭ باس مامانى، تىلدەردى دامىتۋ ءبولىمىنىڭ باسشىسى، وسى ۋاقىتقا دەيىن تالدىقورعان قالاسى اكىمدىگىنىڭ ىشكى ساياسات ءبولىمىنىڭ باسشىسى بولىپ جۇمىس ىستەگەن.
«اتالعان جەمقورلىق قىلمىسىن تەرگەۋ جالعاسىپ جاتىر. باسقا مالىمەتتەر تەرگەۋ مۇددەسىنە بايلانىستى جاريالانبايدى»، – دەلىنگەن دەپارتامەنت حابارلاماسىندا.
وتكەن جۇمادا، 30 شىلدەدە تالدىقورعان قالاسىنىڭ انتيكورى كارانتين شارالارىنىڭ ىسكە اسۋىن باقىلاۋعا مىندەتتى مونيتورينگ توبىنىڭ مۇشەلەرىن ۇستاعان. شەنەۋنىكتەر پاندەميا كەزىندە ءبىر ەمەس، بىرنەشە كاسىپكەردەن جۇيەلى تۇردە پارا العان دەگەن كۇدىكپەن ءىستى بولىپ جاتىر. ەگەر سوت ايىپتى دەپ تانىسا، كۇدىكتىلەرگە قوماقتى كولەمدە ايىپپۇل سالىنۋى نە مۇلكى تاركىلەنىپ، جەتى جىلدان ون ەكى جىلعا دەيىن باس بوستاندىعىنان ايىرىلۋى مۇمكىن.
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟