Teatr rejisseri Bolat Atabaev. Germaniya, 27 tamız 2012 jıl. Fotografiya Lwqpan Ahmed'yarovtıñ Facebook paraqşasınan alınğan

Belgili rejisser, Qazaqstannıñ eñbek siñirgen öner qayratkeri, «Aqsaray» teatrınıñ körkemdik jetekşisi, dissident qayratker Bolat Atabaevtıñ qaytıs bolğanı habarlandı.

Teatr öneri men körkem tanım bağıtında erekşe äri tabıstı eksperimentterge qol jetkizgen mädeniet-öner qayratkeri öziniñ azamattıq wstanımı arqılı köptiñ ıqılasına bölendi.

Aqparat qwraldarı Atabaev soñğı eki-üş kün Qalqaman ıqşam audanındağı №7 auruhananıñ jansaqtau bölimine büyregine suıq tiip tüsken jönindegi jaqındarınıñ habarın jazıp jatır.

Ol Almatı şet tilder pedagogikalıq institutın, keyinnen osında Memlekettik teatr-körkemsuret institutın  bitirgen. 90-jıldardıñ basında Myunhen (Germaniya) wlttıq teatrınan tälim alğan. Elge oralğan soñ alğaşqı eñbek jolın Qarağandı oblısı Temirtau qalasındağı nemis drama teatrında F.Şillerdiñ «Zwlımdıq pen mahabbatın», A.Zakstıñ «Öz oşağıñ» dramaların, V.Geynctiñ «Jüzdegen jıl tolqın darında», «Adamdar jäne tağdırlar» tarihi diologiyasın sahnalaumen bastadı. 1990 jılı Qazaq akademiyası drama teatrına (qazirgi M.Äuezov atındağı – QT) jwmısqa auısıp, B.Rimovanıñ «Qos mwñlıq», M.Maqataevtıñ «Qoş, mahabbat», sonday-aq, I.Orazbaevtıñ «Şıñğıshan», M.Meterlingtiñ «Soqırlar», R.Mwqanovanıñ «Mäñgilik bala beyne», A.P. Çehovtıñ «Şağala», Ä.Kekilbaevtiñ «Abılay han», B.Brehttiñ «Toğışardıñ toyı», M.Äuezovtiñ «Qaragöz», t.b. spektakl'derin qoyğan.

Batıl sahnalıq eksperimentter men ötkir ideyalarğa baratın, spektakl'diñ körkemdik-estetikalıq män-mazmwnın aşuğa den qoyatın izdenimpaz rejisser azamattıq qoğam ömirine de «romantikalıq mwratpen» riyasız atsalıstı. 69 jasında ömirden ozğan Bolat Atabaev keyingi kezderi qoğamğa aşılıp, «Jaña Alaş» YouTube arnasına seriyalıq swhbat berip edi.

Jañaözen oqiğası kezinde bilik abaqtığa qamap, qılmıstıq jauapkerşilikke tartuğa talpınğan Bolat Atabaev keyin biraz jıl Germaniyada twrğan.

Redakciya wjımı Qazaqstannıñ täuelsizdik tarihında öner men mädenietine eñbek siñirip, memlekettiñ sayasi ömirine ziyalılar atınan halıq jağında bolğan erekşe qayratkerdiñ qazasına baylanıstı Atabaevtar otbasına jäne barşa qazaqstandıqtarğa qayğıra köñil aytadı.

"The Qazaq Times"