بەلگىلى رەجيسسەر، ديسسيدەنت بولات اتاباەۆ ومىردەن وزدى

بەلگىلى رەجيسسەر، قازاقستاننىڭ ەڭبەك سىڭىرگەن ونەر قايراتكەرى^, «اقساراي» تەاترىنىڭ كوركەمدىك جەتەكشىسى، ديسسيدەنت قايراتكەر بولات اتاباەۆتىڭ قايتىس بولعانى حابارلاندى.

تەاتر ونەرى مەن كوركەم تانىم باعىتىندا ەرەكشە ءارى تابىستى ەكسپەريمەنتتەرگە قول جەتكىزگەن مادەنيەت-ونەر قايراتكەرى ءوزىنىڭ ازاماتتىق ۇستانىمى ارقىلى كوپتىڭ ىقىلاسىنا بولەندى.

اقپارات قۇرالدارى اتاباەۆ سوڭعى ەكى-ءۇش كۇن قالقامان ىقشام اۋدانىنداعى №7 اۋرۋحانانىڭ جانساقتاۋ بولىمىنە بۇيرەگىنە سۋىق ءتيىپ تۇسكەن جونىندەگى جاقىندارىنىڭ حابارىن جازىپ جاتىر.

ول الماتى شەت تىلدەر پەداگوگيكالىق ينستيتۋتىن، كەيىننەن وسىندا مەملەكەتتىك تەاتر-كوركەمسۋرەت ينستيتۋتىن  بىتىرگەن. 90-جىلداردىڭ باسىندا ميۋنحەن (گەرمانيا) ۇلتتىق تەاترىنان ءتالىم العان. ەلگە ورالعان سوڭ العاشقى ەڭبەك جولىن قاراعاندى وبلىسى تەمىرتاۋ قالاسىنداعى نەمىس دراما تەاترىندا ف.شيللەردىڭ «زۇلىمدىق پەن ماحابباتىن»، ا.زاكستىڭ «ءوز وشاعىڭ» درامالارىن، ۆ.گەينتستىڭ «جۇزدەگەن جىل تولقىن دارىندا»، «ادامدار جانە تاعدىرلار» تاريحي ديولوگياسىن ساحنالاۋمەن باستادى. 1990 جىلى قازاق اكادەمياسى دراما تەاترىنا (قازىرگى م.اۋەزوۆ اتىنداعى – QT) جۇمىسقا اۋىسىپ، ب.ريموۆانىڭ «قوس مۇڭلىق»، م.ماقاتاەۆتىڭ «قوش، ماحاببات»، سونداي-اق، ي.ورازباەۆتىڭ «شىڭعىسحان»، م.مەتەرلينگتىڭ «سوقىرلار»، ر.مۇقانوۆانىڭ «ماڭگىلىك بالا بەينە»، ا.پ. چەحوۆتىڭ «شاعالا»، ا.كەكىلباەۆتىڭ «ابىلاي حان»، ب.برەحتتىڭ «توعىشاردىڭ تويى»، م.اۋەزوۆتىڭ «قاراگوز»، ت.ب. سپەكتاكلدەرىن قويعان.

باتىل ساحنالىق ەكسپەريمەنتتەر مەن وتكىر يدەيالارعا باراتىن، سپەكتاكلدىڭ كوركەمدىك-ەستەتيكالىق ءمان-مازمۇنىن اشۋعا دەن قوياتىن ىزدەنىمپاز رەجيسسەر ازاماتتىق قوعام ومىرىنە دە «رومانتيكالىق مۇراتپەن» رياسىز اتسالىستى. 69 جاسىندا ومىردەن وزعان بولات اتاباەۆ كەيىنگى كەزدەرى قوعامعا اشىلىپ، «جاڭا الاش» YouTube ارناسىنا سەريالىق سۇحبات بەرىپ ەدى.

جاڭاوزەن وقيعاسى كەزىندە بيلىك اباقتىعا قاماپ، قىلمىستىق جاۋاپكەرشىلىككە تارتۋعا تالپىنعان بولات اتاباەۆ كەيىن ءبىراز جىل گەرمانيادا تۇرعان.

رەداكتسيا ۇجىمى قازاقستاننىڭ تاۋەلسىزدىك تاريحىندا ونەر مەن مادەنيەتىنە ەڭبەك ءسىڭىرىپ، مەملەكەتتىڭ ساياسي ومىرىنە زيالىلار اتىنان حالىق جاعىندا بولعان ەرەكشە قايراتكەردىڭ قازاسىنا بايلانىستى اتاباەۆتار وتباسىنا جانە بارشا قازاقستاندىقتارعا قايعىرا كوڭىل ايتادى.

"The Qazaq Times"