«التىن ساندىق ۇستىندەگى تارشىلىق»: ماڭعىستاۋ جۇمىسشىلارىنىڭ ەرەۋىلى تاعى ءبىر ۇجىممەن تولىقتى

قازاقستاندا جۇمىسشىلار تابىنىڭ الەۋمەتتىك ساياساتى السىرەگەندىگى بايقالادى. بيىل جيىلەگەن ماڭعىستاۋداعى ەڭبەك داۋىنا بايلانىستى ەرەۋىلدەر قاتارى قاراجانباسمۇناي كەنىشىندە ىستەيتىن جۇمىسشىلارىنىڭ نارازىلىعى تولىقتىردى.

ازاتتىق راديوسىنىڭ حابارلاۋىنشا, 28 شىلدەدە «قاراجانباسمۇناي» كومپانياسىنا اۋتسورسينگ كەلىسىم-شارتپەن قىزمەت كورسەتىپ جاتقان Industrial service resources مەكەمەسىنىڭ 170-تەن استام جۇمىسشىسى ەرەۋىلگە شىقتى. ولار جۇمىس بەرۋشىگە بىرنەشە تالاپ قويىپ وتىر. اتاپ ايتقاندا:

• اۋتسورسينگ مەكەمە جۇمىسشىلارىن «قاراجانباسمۇناي» كومپانياسىنا شتاتقا الۋ;
• مامىر ايىندا مەكەمەنىڭ 70-كە جۋىق جۇمىسشىسىنىڭ جالاقىسى تەك 4 پايىزعا عانا كوتەرىلگەن، ونى قاجەتىنشە ءوسىرۋ;
• الەۋمەتتىك پاكەت ەنگىزۋ;

قازىر نارازىلار جۇمىستى تولىق توقتاتقان. ينتەرنەتتە تاراعان ۆيدەودا جۇزدەن استام ادامنىڭ كەنىش ماڭىنداعى جۇمىسشىلار قالاشىعىندا تۇرعانى كورىنەدى.

– «قاراجامباسمۇنايدا» جۇمىستىڭ 70%-ىن وسى اۋتسورسينگ مەكەمە جىگىتتەرى اتقارىپ ءجۇر. ونى باستىقتار دا بىلەدى. ىندەت جاعدايدى ۋشىقتىرىپ جىبەردى. مۇندا ءدارى-دارمەككە اقشا تابا الماي وتىرعان جۇمىسشىلار بار. جالاقى ماردىمسىز بولعاندىقتان ايەلى، بالا-شاعاسى اۋىرىپ، ءدارى-دارمەك ءۇشىن قارىزدانىپ كەتكەن ادامدار بار. بىرىنە جەتسە، بىرىنە جەتپەيدى. تالاپتارىمىز ورىندالمايىنشا، ەرەۋىلدى توقتاتپايمىز، – دەگەن اتى-ءجونىن ايتپاعان جۇمىسشىلاردىڭ ءبىرى ازاتتىق راديوسىنا.

جۇمىسشىلاردىڭ سوزىنە قاراعاندا، سارسەنبى كۇنى ولارعا باسشىلىقتان وڭعار قابىلوۆ ەسىمدى ادام كەلگەن. نارازىلار وعان تالاپتارىن جەتكىزگەن. قابىلوۆ اقپارات قۇرالى حابارلاسقاندا ءتىلشى ەكەنىن بىلگەن بويدا تۇتقانى ءوشىرىپ تاستاعان.

اقپاراتقا قاراعاندا، Industrial service resources كومپانياسى قۇرىلىس-مونتاج، ۇڭعىما جوندەۋ سياقتى ءتۇرلى قىزمەت كورسەتۋمەن اينالىسادى. «قاراجانباسمۇناي» كەنىشى ماڭعىستاۋ وبلىسى تۇپقاراعان اۋدانىندا ورنالاسقان.

شىلدە ايىنىڭ ورتاسىندا «قاراجانباسمۇنايعا» كۇزەت قىزمەتىن كورسەتەتىن مەكەمە جۇمىسشىلارى باس كوتەرىپ، تالاپتارى ورىندالعاننان كەيىن جۇمىسقا شىققان. ءدال وسىعان ۇقساس سيپاتتا جىل باسىنان بەرى Caspian Catering Service, NBKS, وزەنەنەرگوسەرۆيس، KMG-Security, مۇنايسپەتسسنابكومپاني ت.ب. كەمىندە ون شاقتى ەڭبەك ۇجىمى ەڭبەك جاعدايىن جاقسارتىپ، جالاقىنى ءوسىرۋدى تالاپ ەتىپ، ەرەۋىلگە شىققان، كەيبىرى اشتىق جاريالاۋعا دا ءماجبۇر بولعان.

قازاقستاندا ەڭبەك ماسەلەلەرى ءجيى كوتەرىلەدى. ساراپشىلار مەن جەلى قولدانۋشىلارى  پاندەميا كەزىندەگى قىمباتشىلىق پەن الەۋمەتتىك احۋالدىڭ ناشارلاۋى سەبەپتى جۇرتتىڭ تۇرمىسى ءتىپتى قيىنداپ، كوبى كۇنكورىس حالىندە تىرشىلىك ەتىپ جۇرگەنىن ايتادى.

“The Qazaq Times”