Foto: ratel.kz

Jezqazğan qalasınıñ köp salalı auruhanasınıñ qızmetkerleri jalaqı jäne özge äleumettik tölemderdiñ uaqıtında berilmey otırğandığına narazı. Medicina qızmetkerleriniñ sözine qarağanda, olar 10 tamızda mekeme basşılığına arız jazıp tapsırğan. Äzirge jauap bolmağan, dep jazdı Azattıq radiosı.

– Jalaqını bölip-bölip beredi, keşiktiredi. Birde 70 mıñ teñge berse, birde 90 mıñ teñge. 24 sağat isteymiz. Kelesi küni säl demalıp qaytadan jwmısqa şığamız. 310 sağatqa 120 mıñ teñge töleydi. 310 sağat bolu üşin neşe tün, neşe kün isteuiñ kerek. Öziñiz eseptey beriñiz. Kündizgi sağatımız 9 sağatpen belgilenedi, Tüngi sağatımız 15 sağatpen belgilenedi. Keyde "adam joq, adam az" dep bizdi 24 sağatqa deyin istetip qoyadı, – deydi atı-jönin atağısı kelmegen medbikelerdiñ biri Azattıqqa.

Jwmısşılardıñ sözine qarağanda, 10 tamızda olarğa 40 mıñ teñge jalaqı tüsken. "Qalğanı qaşan beriletinin bilmey otırmız" deydi qızmetkerler.

Auruhana qızmetkerleri mindetti äleumettik medicinalıq saqtandıru, zeynetaqı jarnası da uaqıtında tüspey otırğanın ayttı.

"Men mısalı mamır ayında demalısqa şıqtım. "Otpusknoy" tek jwmısqa bir apta qalğan kezde ğana tüsti. Joldasım korporaciyada istegennen keyin ğana asa qattı qinalmay otırmız. Negizi özimizdiñ mañday terimizben istegen eñbekaqımızdı ala almay otırmız. Men nege onı swray almaymın?" deydi auruhana qızmetkerleriniñ biri.

"Meniñ medicina salasında jürgenime 11 jıl boldı. Jağday uşığıp ketkeni sonşalıqtı meniñ bwl salada istegim kelmeydi" dedi ol.

Onıñ aytuınşa,mekeme basşılığı auruhanağa adam az kelgendikten tabıs az tüsetinin, ketken şığındı aqtalmaytının alğa tartqan.

Medicina qızmetkerlerdiñ barlığı-derlik atı-jönderin Azattıqqa aytqanmen jañalıqta körsetpeudi ötindi. "Basşılıq qısım jasaydı, jwmıstan quadı, jinalısqa saladı" deydi olar.

Azattıq tilşisi 11 tamızda Jezqazğan köpsalalı auruhanasınıñ birneşe telefonına habarlasıp körgen edi. Alayda telefon twtqasın eşkim kötermedi. Mekeme bastığı Mwratbek Maldıbekwlı da wyalı telefonına jauap bermedi.

Wlıtau oblısınıñ ortalığı Jezqazğan köpsalalı auruhanasınıñ resmi saytındağı mälimet boyınşa, mekemede 500-den astam adam jwmıs isteydi. Auruhana Jezqazğan, Sätpaev qalaları, Jäyrem men Qarajal auıldarı twrğındarına qızmet körsetedi.