Koronavirusqa qatıstı şaqırtuğa barıp-qaytqan däriger men fel'dşer qorğanış kiimderin juıp, üsti-basın virustan zalalsızdandırıp jatır. Almatı qalasındağı jedel järdem qızmetiniñ №6 stanciyası. 14 şilde 2021 jıl. Foto: QT / Kültegin Aspanwlı

Almatı qalasınıñ qoğamdıq densaulıq saqtau basqarması DenMin birlesip, tamız jäne qırküyek aylarına arnalğan boljamın jariyaladı. Basqarma jetekşisi Nariman Tabınbaevtıñ aytuınşa, epidahual jağımsız scenariyge ausa, tamız ayında 34 500 adam auıruı mümkin.

Seysenbi küni qalalıq Öñirlik kommunikaciyalar qızmetinde ötken brifingte Tabınbaev ministrlik pen basqarma birge dayındağan 30 qırküyekke deyingi aralıqqa arnalğan resmi boljamın mälimdedi.

– Negizgi boljamğa säykes, törtinşi tolqınnıñ şarıqtau şegi tamız ayınıñ birinşi onkündiginde boladı, täuligine 1600-ge juıq jaña jağday tirkeledi. Pessimistik boljamda indettiñ örşu kezeñi 10-11 tamızğa tws keletini körsetilgen, bwl künderi künine 1900-ge deyin nauqas anıqtaluı ğajap emes. Tamızda 34,5 mıñ, qırküyekte 4,5 mıñ adam auıruı ıqtimal. Küzge qaray derttiñ beti bäseñdep, qarqını tömendeydi, – dedi.

Basqarma basşınıñ mälimdeuinşe, Almatıda koronavirusqa şaldıqqandardıñ arasında auruhanağa jatqızılıp jatqandarı edäuir artqan. Täuligine 400 şaqtı adam tösekke tañılıp otır. Sonımen qosa, üyde emdelip jatqan nauqastar qatarı 5 esege ösken. Jedel järdem qızmetine tüsetin qoñırau sanı 2700-ge jetken. Şilde ayında JRVI, koronvirus jäne pnevmoniya auruları boyınşa qoñıraular eki esege köbeygen.

«7 mıñ infekciyalıq tösek dayındaldı. Rezervte qosımşa 3000 tösek-orın äzir twr. Epidahual naşarlay qalğan jağdayda kerek bolar degen maqsatta 2 mıñ orın izdestirilip jatır. Bügingi derekke say, 6,4 mıñ orındı tösek jüktemesinde 3827 nauqas emdelude, onıñ 239-ı bala. Ondağı 114 sırqat asa auır jäne 956 adamnıñ häli auır jağdayda. Jwqpalı aurular stacionarlarındıñ reanimaciya böliminde 500 orın bolsa, qazirgi kezde onıñ  jükteme 52%-ı tolğan», – dedi Tabınbaev resmi bayandamasında.

Qalada jıl basınan beri tek koronavirustıñ özinen (kovid pnevmoniyasın eseptemegende) 703 adam qaytıs bolğan. Ekpeniñ keminde bir dozasın alğan twrğındar 768 mıñnan assa, tolıq doza alğandar 500 mıñğa juıqtağan.

Tabınbaevtiñ deregine qarağanda, qazirgi tañda nauqastardı emdeuge 6 mıñnan asa medqızmetker jwmıldırılğan. Rezervte tağı 1700 maman bar.

“The Qazaq Times”