كوروناۆيرۋسقا قاتىستى شاقىرتۋعا بارىپ-قايتقان دارىگەر مەن فەلدشەر قورعانىش كيىمدەرىن جۋىپ، ءۇستى-باسىن ۆيرۋستان زالالسىزداندىرىپ جاتىر. الماتى قالاسىنداعى جەدەل جاردەم قىزمەتىنىڭ №6 ستانتسياسى. 14 شىلدە 2021 جىل. فوتو: QT / كۇلتەگىن اسپانۇلى

الماتى قالاسىنىڭ قوعامدىق دەنساۋلىق ساقتاۋ باسقارماسى دەنمين بىرلەسىپ، تامىز جانە قىركۇيەك ايلارىنا ارنالعان بولجامىن جاريالادى. باسقارما جەتەكشىسى ناريمان تابىنباەۆتىڭ ايتۋىنشا، ەپيداحۋال جاعىمسىز ستسەناريگە اۋسا، تامىز ايىندا 34 500 ادام اۋىرۋى مۇمكىن.

سەيسەنبى كۇنى قالالىق وڭىرلىك كوممۋنيكاتسيالار قىزمەتىندە وتكەن بريفينگتە تابىنباەۆ مينيسترلىك پەن باسقارما بىرگە دايىنداعان 30 قىركۇيەككە دەيىنگى ارالىققا ارنالعان رەسمي بولجامىن مالىمدەدى.

– نەگىزگى بولجامعا سايكەس، ءتورتىنشى تولقىننىڭ شارىقتاۋ شەگى تامىز ايىنىڭ ءبىرىنشى ونكۇندىگىندە بولادى، تاۋلىگىنە 1600-گە جۋىق جاڭا جاعداي تىركەلەدى. پەسسيميستىك بولجامدا ىندەتتىڭ ءورشۋ كەزەڭى 10-11 تامىزعا تۇس كەلەتىنى كورسەتىلگەن، بۇل كۇندەرى كۇنىنە 1900-گە دەيىن ناۋقاس انىقتالۋى عاجاپ ەمەس. تامىزدا 34,5 مىڭ، قىركۇيەكتە 4,5 مىڭ ادام اۋىرۋى ىقتيمال. كۇزگە قاراي دەرتتىڭ بەتى باسەڭدەپ، قارقىنى تومەندەيدى، – دەدى.

باسقارما باسشىنىڭ مالىمدەۋىنشە، الماتىدا كوروناۆيرۋسقا شالدىققانداردىڭ اراسىندا اۋرۋحاناعا جاتقىزىلىپ جاتقاندارى ەداۋىر ارتقان. تاۋلىگىنە 400 شاقتى ادام توسەككە تاڭىلىپ وتىر. سونىمەن قوسا، ۇيدە ەمدەلىپ جاتقان ناۋقاستار قاتارى 5 ەسەگە وسكەن. جەدەل جاردەم قىزمەتىنە تۇسەتىن قوڭىراۋ سانى 2700-گە جەتكەن. شىلدە ايىندا جرۆي، كورونۆيرۋس جانە پنەۆمونيا اۋرۋلارى بويىنشا قوڭىراۋلار ەكى ەسەگە كوبەيگەن.

«7 مىڭ ينفەكتسيالىق توسەك دايىندالدى. رەزەرۆتە قوسىمشا 3000 توسەك-ورىن ءازىر تۇر. ەپيداحۋال ناشارلاي قالعان جاعدايدا كەرەك بولار دەگەن ماقساتتا 2 مىڭ ورىن ىزدەستىرىلىپ جاتىر. بۇگىنگى دەرەككە ساي، 6,4 مىڭ ورىندى توسەك جۇكتەمەسىندە 3827 ناۋقاس ەمدەلۋدە، ونىڭ 239-ى بالا. ونداعى 114 سىرقات اسا اۋىر جانە 956 ادامنىڭ ءحالى اۋىر جاعدايدا. جۇقپالى اۋرۋلار ستاتسيونارلارىندىڭ رەانيماتسيا بولىمىندە 500 ورىن بولسا، قازىرگى كەزدە ونىڭ  جۇكتەمە 52%-ى تولعان»، – دەدى تابىنباەۆ رەسمي بايانداماسىندا.

قالادا جىل باسىنان بەرى تەك كوروناۆيرۋستىڭ وزىنەن (كوۆيد پنەۆمونياسىن ەسەپتەمەگەندە) 703 ادام قايتىس بولعان. ەكپەنىڭ كەمىندە ءبىر دوزاسىن العان تۇرعىندار 768 مىڭنان اسسا، تولىق دوزا العاندار 500 مىڭعا جۋىقتاعان.

تابىنباەۆتىڭ دەرەگىنە قاراعاندا، قازىرگى تاڭدا ناۋقاستاردى ەمدەۋگە 6 مىڭنان اسا مەدقىزمەتكەر جۇمىلدىرىلعان. رەزەرۆتە تاعى 1700 مامان بار.

“The Qazaq Times”