Almatı qalasındağı Ortalıq klinikalıq auruhanasınıñ jansaqtau böliminde koronavirustıñ asqınğan türimen auırıp jatqan nauqastar. 15 şilde 2021 jıl. Foto: QT / Kültegin Aspanwlı

Bir aptadan asa uaqıt täuligine 5 mıñnan asa keysten anıqtalıp jatqan Qazaqstanda koronavirus pen osı tektes pnevmoniyağa şaldıqqandar sanı tağı 5742 adamğa köbeydi. Törtinşi tolqın üdegen şilde ayınıñ alğaşqı eki dekadasında 86 mıñnan astam sırqat tirkelip ülgerdi. Ölim körsetkişi de üdep twr.

Densaulıq saqtau ministrliginiñ resmi mälimetinşe, elde 21 şildede koronavirus (KVI+) jwqqan 5708 adam, al 20-sı koronavirus pnevmoniyasına (KVI-) şaldıqqan 34 adam tirkeldi. Qazir elde 67 mıñ adam (KVI+ boyınşa 65 808, KVI- boyınşa 1667) auırıp jatır.

#COVID  Ötken küni PTR testi arqılı koronavirus jwqqanı rastalğan nauqastar qatarı tağı arttı. Olardıñ basım böligi ädettegidey astana (1369),  Almatı qalası (993) jäne Qarağandı oblısında (698) tirkeldi. Bwdan özge Şımkent (418), Atırau (386), Mañğıstau (207), Pavlodar (197), Aqtöbe (192), Aqmola (186), Almatı (178), BQO (170), Qostanay (149), Qızılorda (139),  Türkistan (123) oblıstarında dert üdep twr. Ötken täulikte 2487 adam ayığıp üyine şığarılğan. Seysenbide jiını 64 adam qaytıs bolğan.

#COVID_pnevmoniyası 20 şildede aqparatı bir täulikke keşigip beriletin koronavirus pnevmoniyasına şaldıqqan 34 nauqas esepke alındı. Vedomstvo dereginşe, sırqattar astana (9), Şımkent (9) qalalarında, ŞQO-da (5) köptep anıqtalğan. Sonımen qosa, 70 adam ayığıp şıqqan, tağı 13 adam köz jwmğan.

#Jalpı  DenMin deregine qarağanda, emdelip jatqan 67 mıñnan asa nauqastıñ 20,5 mıñı auruhanada, 47 mıñdayı ambulatorlıq baqılauda. 1190 nauqastıñ jağdayı naşar, ondağı 272 adamnıñ häli öte auır. Bwdan özge 168 sırqat ökpeni jasandı jeldetu apparatımen tınıstap jatır.

Virustıñ taralu qateri jağınan respublikanıñ barlıq öñiri sarğayıp-qızara tüsti. «Qızıl aymaqqa» engen öñirler: astana, Almatı, Şımkent qalaları men Almatı, Aqmola, Atırau, Aqtöbe,  BQO, Qarağandı, Mañğıstau, Qostanay, Qızılorda, SQO, Pavlodar, Jambıl oblıstarı. Al özge ŞQO jäne Türkistan öñirleri «sarı aymaqta» twr. Qazaqstan twstas qızıl reñge boyaldı.

DenMin habarınşa, 1 şildede PTR skriningi negizinde 414 sınama jürgizilgen. Säykesinşe, barlıq ülginiñ 48,3%-ınan Qazaqstannıñ tügel aymağınan ündistandıq «Del'ta» ştamı anıqtalğan. Ükimet mälimetinşe, biıl köktem-jazda genomdıq zertteu nätijesinde eldiñ basım böliginen virustıñ braziliyalıq, britandıq, oñtüstikafrikalıq jäne ündistandıq ştamdarı anıqtalğan.

Bıltır 13 naurızdan beri COVID-19 infekciyasın jwqtırğandar qatarı 510 mıñğa, 1 tamızdan bılayğı koronavirus pnevmoniyası 59 mıñğa juıqtadı. DDSW derekqorı men Wlttıq statistikada Qazaqstanda auırğandar sanı 569 mıñğa şamaladı. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardan 11 122 adam (KVI+ / U07.1 – 5180, KVI- / U07.2 – 3575, ilespe aurulardan – 2367) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazaqstan virus taraluı boyınşa älemde Djons Hopkins universiteti jäne DDSW tizimindegi 221 el men aymaqtıñ arasında 42-orında twr.

Ükimettiñ soñğı deregine qarağanda, Qazaqstanda 2 mln 992 mıñ adam koronavirusqa qarsı vakcinanı tolıq alğan.

"The Qazaq Times"