Kireberis esikke ilingen betperde jönindegi eskertpe. I.S.Jekenova atındağı qalalıq klinikalıq jwqpalı aurular auruhanasınıñ Türksib audanındağı filialı. Almatı qalası. Foto: QT / Kültegin Aspanwlı

Qazaqstanda indet äli de örşip twr. 12 şildede elde 3693 adamnıñ koronavirus testi oñ şıqtı. Al 11 şildede 19 adamnıñ pnevmoniyağa şaldıqqanı anıqtaldı. Bwl aqparattı densaulıq saqtaui ministrligi habarladı.

Vedomstvo dereginşe, ötken täulikte astanada 978 adamnan koronavirus tabılğan. Bwl respublika boyınşa bir künde tirkelgen eñ joğarı körsetkiş. Bwğan qosa, indet bastalğalı beri astanada bir künde osınşa köp nauqas anıqtalmağan. Almatıda – 535, Qarağandı oblısında – 596, Atırau oblısında – 334, Şımkentte – 169, Batıs Qazaqstan oblısında – 142, Aqmola oblısında – 140, Mañğıstau oblısında – 141, Pavlodar oblısında 134 nauqas tirkeldi. Qalğan oblıstarda anıqtalğan nauqastar jüzge jetpeydi.

Seysenbi küni Soltüstik Qazaqstan oblısı koronavirus tarauı boyınşa "qızıl aymaqqa" endi. Qazir barlığın eseptegende "qızıl aymaqta" üş iri qala men 9 oblıs twr: Astana, Almatı, Şımkent qalaları, Pavlodar, Atırau, Qarağandı, Aqmola, Qostanay, Aqtöbe, Mañğıstau, Batıs Qazaqstan, Soltüstik Qazaqstan oblıstarı. Algoritmge säykes, "qızıl aymaqtarda" karantin küşeyedi. "Sarı aymaqta" Almatı oblısı, Jambıl men Qızılorda oblıstarı qalğan. Türkistan men Şığıs Qazaqstan oblıstarı "jasıl aymaqta".

Soñğı resmi mälimet boyınşa, Qazaqstanda 2020 jıldıñ naurız ayınan beri 462 417 adamğa koronavirus jwqtı. Olardıñ 4716-sı qaytıs bolğan.

Ükimet bıltır tamızdan beri PTR testimen rastalmağan, biraq auru belgileri boyınşa koronavirusqa wqsaytın pnevmoniya esebin jürgizip keledi. 11 şildege deyin 57 919 adam pnevmoniyanıñ osı türine şaldıqqan, 3498-i qaytıs bolğan.

Elde 11 şildede koronavirus pen onığ pnevmoniyasınan 41 adam qaytıs bolğan.

Qazaqstanda aqpan ayınan beri halıqqa koronavirusqa qarsı vakcina salına bastadı. Sodan beri 4 mln 486 mıñ adam vakcinanıñ keminde bir dozasın alğan. 2 mln 490 mıñ adam vakcinanıñ eki dozasın alğan.

"The Qazaq Times"