كىرەبەرىس ەسىككە ىلىنگەن بەتپەردە جونىندەگى ەسكەرتپە. ي.س.جەكەنوۆا اتىنداعى قالالىق كلينيكالىق جۇقپالى اۋرۋلار اۋرۋحاناسىنىڭ تۇركسىب اۋدانىنداعى فيليالى. الماتى قالاسى. فوتو: QT / كۇلتەگىن اسپانۇلى

قازاقستاندا ىندەت ءالى دە ءورشىپ تۇر. 12 شىلدەدە ەلدە 3693 ادامنىڭ كوروناۆيرۋس تەستى وڭ شىقتى. ال 11 شىلدەدە 19 ادامنىڭ پنەۆمونياعا شالدىققانى انىقتالدى. بۇل اقپاراتتى دەنساۋلىق ساقتاۋى مينيسترلىگى حابارلادى.

ۆەدومستۆو دەرەگىنشە، وتكەن تاۋلىكتە استانادا 978 ادامنان كوروناۆيرۋس تابىلعان. بۇل رەسپۋبليكا بويىنشا ءبىر كۇندە تىركەلگەن ەڭ جوعارى كورسەتكىش. بۇعان قوسا، ىندەت باستالعالى بەرى استانادا ءبىر كۇندە وسىنشا كوپ ناۋقاس انىقتالماعان. الماتىدا – 535, قاراعاندى وبلىسىندا – 596, اتىراۋ وبلىسىندا – 334, شىمكەنتتە – 169, باتىس قازاقستان وبلىسىندا – 142, اقمولا وبلىسىندا – 140, ماڭعىستاۋ وبلىسىندا – 141, پاۆلودار وبلىسىندا 134 ناۋقاس تىركەلدى. قالعان وبلىستاردا انىقتالعان ناۋقاستار جۇزگە جەتپەيدى.

سەيسەنبى كۇنى سولتۇستىك قازاقستان وبلىسى كوروناۆيرۋس تاراۋى بويىنشا "قىزىل ايماققا" ەندى. قازىر بارلىعىن ەسەپتەگەندە "قىزىل ايماقتا" ءۇش ءىرى قالا مەن 9 وبلىس تۇر: استانا، الماتى، شىمكەنت قالالارى، پاۆلودار، اتىراۋ، قاراعاندى، اقمولا، قوستاناي، اقتوبە، ماڭعىستاۋ، باتىس قازاقستان، سولتۇستىك قازاقستان وبلىستارى. الگوريتمگە سايكەس، "قىزىل ايماقتاردا" كارانتين كۇشەيەدى. "سارى ايماقتا" الماتى وبلىسى، جامبىل مەن قىزىلوردا وبلىستارى قالعان. تۇركىستان مەن شىعىس قازاقستان وبلىستارى "جاسىل ايماقتا".

سوڭعى رەسمي مالىمەت بويىنشا، قازاقستاندا 2020 جىلدىڭ ناۋرىز ايىنان بەرى 462 417 ادامعا كوروناۆيرۋس جۇقتى. ولاردىڭ 4716-سى قايتىس بولعان.

ۇكىمەت بىلتىر تامىزدان بەرى پتر تەستىمەن راستالماعان، بىراق اۋرۋ بەلگىلەرى بويىنشا كوروناۆيرۋسقا ۇقسايتىن پنەۆمونيا ەسەبىن جۇرگىزىپ كەلەدى. 11 شىلدەگە دەيىن 57 919 ادام پنەۆمونيانىڭ وسى تۇرىنە شالدىققان، 3498-ءى قايتىس بولعان.

ەلدە 11 شىلدەدە كوروناۆيرۋس پەن ونىع پنەۆمونياسىنان 41 ادام قايتىس بولعان.

قازاقستاندا اقپان ايىنان بەرى حالىققا كوروناۆيرۋسقا قارسى ۆاكتسينا سالىنا باستادى. سودان بەرى 4 ملن 486 مىڭ ادام ۆاكتسينانىڭ كەمىندە ءبىر دوزاسىن العان. 2 ملن 490 مىڭ ادام ۆاكتسينانىڭ ەكى دوزاسىن العان.

"The Qazaq Times"