«Jañaözen jarası»: Ereuildetken kezbilikter Toqaev pen Maminge ündeu jasadı

Särsenbi tañnan bastap Jañaözendegi «KEZBI» mwnay kompaniyasınıñ ereuilge şıqqan jüzdegen jwmıskeri şildeniñ 1-ine qarağan tüni «Wjımdıq talap arız orındalsın» degen uäjben eñbek bazasında tünep şıqtı. 

«Kilem-tösenişter tösenip jatqan jwmısşılardıñ talabın eşkim qwlaqqa asar emes. 2,5 jıldan beri talabımız orındalmağandıqtan beybit ereuilge twrdıq. Kelisim komissiyasınan oñ nätije bolmağandıqtan narazılıq jalğasıp jatır. El prezidenti men Ükimet basşısınan osı mäsele boyınşa oñ şeşim şığarudı swraymız», – dep oqıdı qalıñ toptıñ atınan jwmısşınıñ biri.

Olar eñbek jağdayın jaqsartıp, jalaqını özge kompaniyalarmen teñestirudi, tariftik esepti qayta qaraudı, qwral-saymandar men qwrılğılardı standartqa say jañalaudı, mereke künderi men auır-ziyan jwmısqa layıqtı ötemaqı retinde on üşinşi jalaqı töleudi talap etiep otır.

«Särsenbi küni kompaniya 150-180 şaqtı qızmetkeri jwmısın toqtatıp, talabın bildirdi. Oqiğa ornına Jañaözen äkimi Maqsat Ibragim, eñbek inseptorı, prokuratura men policiya qızmetkerleri bardı. «KEZBI» JŞS jwmısşılarınıñ talabın qaraytın ortaq komissiya qwrıladı. Barlıq mäsele zañ ayasında qaralatın boladı», – Jañaözen qalası äkiminiñ orınbasarı Ğalım Bayjanov aqparat qwraldarına bergen pikirinde.

Biraq Azattıq radiosınıñ habarlauınşa, narazılıq jiınına äkimdik ökili aytqanday 150-180 emes, 600 adam qatısqan. Jalaqını ösirip, eñbek jağdayın jaqsartudı talap etken jwmısşılar 21 mausımda äkimdik pen qwzırlı organdarğa ereuilge şığuğa mäjbür ekenin eskertkenin aytadı. Narazılardıñ bastı uäjiniñ biri – 2019 jılı qwrılğan täuelsiz käsipodaq wyımına («Intımaq» qwramına engen) jwmıs beruşi taraptan kedergi köbeygen. Osı sebepti birneşe ret bas kötergen, äzirge nätijesi deydi.

Talabı orındalmay qaytpaymız degen jwmısşılar birneşe jıldan beri şeşimin tappay «sozılmalı» sipat alğan mäselege nüste qoyar kez keldi dep esepteydi.

30 jılday bwrın qwrılğan «KEZBI» Mañğıstau oblısındağı mwnay kompaniyalarınıñ wñğımaların jöndeu bağıtında qızmet körsetedi. Ol «ÖzenMwnayGaz» öndiruşi kompaniyasınıñ iri merdigeri bolıp tabıladı. Mwnda 27 brigada jwmıs isteydi. Kompaniyada 1200-ge juıq adam jwmıs isteydi.

Energetika ministri Nwrlan Noğaevtıñ aytuınşa, bıltır Qazaqstanda 85,7 mln tonna mwnay men kondensat öndirilgen, onı basım böligi sırtqa eksporttalğan. Jılına ondağan million tonna mwnay öndiretin öñirdiñ jwmısşıları eñbek jağdayınıñ naşarlığı men jalaqınıñ ädiletsizdigine jii şağınadı. Aptap ıstıqtıñ astında küni-tüni qara mwnay bwrğılaytın jwmısşılarğa äleumettik qoldau az, köbi türli auır sırqattarğa şaldığıp jatadı.

“The Qazaq Times”