«جاڭاوزەن جاراسى»: ەرەۋىلدەتكەن كەزبيلىكتەر توقاەۆ پەن مامينگە ۇندەۋ جاسادى

سارسەنبى تاڭنان باستاپ جاڭاوزەندەگى «كەزبي» مۇناي كومپانياسىنىڭ ەرەۋىلگە شىققان جۇزدەگەن جۇمىسكەرى شىلدەنىڭ 1-ىنە قاراعان ءتۇنى «ۇجىمدىق تالاپ ارىز ورىندالسىن» دەگەن ۋاجبەن ەڭبەك بازاسىندا تۇنەپ شىقتى. 

«كىلەم-توسەنىشتەر توسەنىپ جاتقان جۇمىسشىلاردىڭ تالابىن ەشكىم قۇلاققا اسار ەمەس. 2,5 جىلدان بەرى تالابىمىز ورىندالماعاندىقتان بەيبىت ەرەۋىلگە تۇردىق. كەلىسىم كوميسسياسىنان وڭ ناتيجە بولماعاندىقتان نارازىلىق جالعاسىپ جاتىر. ەل پرەزيدەنتى مەن ۇكىمەت باسشىسىنان وسى ماسەلە بويىنشا وڭ شەشىم شىعارۋدى سۇرايمىز»، – دەپ وقىدى قالىڭ توپتىڭ اتىنان جۇمىسشىنىڭ ءبىرى.

ولار ەڭبەك جاعدايىن جاقسارتىپ، جالاقىنى وزگە كومپانيالارمەن تەڭەستىرۋدى، تاريفتىك ەسەپتى قايتا قاراۋدى، قۇرال-سايماندار مەن قۇرىلعىلاردى ستاندارتقا ساي جاڭالاۋدى، مەرەكە كۇندەرى مەن اۋىر-زيان جۇمىسقا لايىقتى وتەماقى رەتىندە ون ءۇشىنشى جالاقى تولەۋدى تالاپ ەتىەپ وتىر.

«سارسەنبى كۇنى كومپانيا 150-180 شاقتى قىزمەتكەرى جۇمىسىن توقتاتىپ، تالابىن ءبىلدىردى. وقيعا ورنىنا جاڭاوزەن اكىمى ماقسات يبراگيم، ەڭبەك ينسەپتورى، پروكۋراتۋرا مەن پوليتسيا قىزمەتكەرلەرى باردى. «كەزبي» جشس جۇمىسشىلارىنىڭ تالابىن قارايتىن ورتاق كوميسسيا قۇرىلادى. بارلىق ماسەلە زاڭ اياسىندا قارالاتىن بولادى»، – جاڭاوزەن قالاسى اكىمىنىڭ ورىنباسارى عالىم بايجانوۆ اقپارات قۇرالدارىنا بەرگەن پىكىرىندە.

بىراق ازاتتىق راديوسىنىڭ حابارلاۋىنشا، نارازىلىق جيىنىنا اكىمدىك وكىلى ايتقانداي 150-180 ەمەس، 600 ادام قاتىسقان. جالاقىنى ءوسىرىپ، ەڭبەك جاعدايىن جاقسارتۋدى تالاپ ەتكەن جۇمىسشىلار 21 ماۋسىمدا اكىمدىك پەن قۇزىرلى ورگاندارعا ەرەۋىلگە شىعۋعا ءماجبۇر ەكەنىن ەسكەرتكەنىن ايتادى. نارازىلاردىڭ باستى ءۋاجىنىڭ ءبىرى – 2019 جىلى قۇرىلعان تاۋەلسىز كاسىپوداق ۇيىمىنا («ىنتىماق» قۇرامىنا ەنگەن) جۇمىس بەرۋشى تاراپتان كەدەرگى كوبەيگەن. وسى سەبەپتى بىرنەشە رەت باس كوتەرگەن، ازىرگە ناتيجەسى دەيدى.

تالابى ورىندالماي قايتپايمىز دەگەن جۇمىسشىلار بىرنەشە جىلدان بەرى شەشىمىن تاپپاي «سوزىلمالى» سيپات العان ماسەلەگە نۇستە قويار كەز كەلدى دەپ ەسەپتەيدى.

30 جىلداي بۇرىن قۇرىلعان «كەزبي» ماڭعىستاۋ وبلىسىنداعى مۇناي كومپانيالارىنىڭ ۇڭعىمالارىن جوندەۋ باعىتىندا قىزمەت كورسەتەدى. ول «وزەنمۇنايگاز» ءوندىرۋشى كومپانياسىنىڭ ءىرى مەردىگەرى بولىپ تابىلادى. مۇندا 27 بريگادا جۇمىس ىستەيدى. كومپانيادا 1200-گە جۋىق ادام جۇمىس ىستەيدى.

ەنەرگەتيكا ءمينيسترى نۇرلان نوعاەۆتىڭ ايتۋىنشا، بىلتىر قازاقستاندا 85,7 ملن توننا مۇناي مەن كوندەنسات وندىرىلگەن، ونى باسىم بولىگى سىرتقا ەكسپورتتالعان. جىلىنا ونداعان ميلليون توننا مۇناي وندىرەتىن ءوڭىردىڭ جۇمىسشىلارى ەڭبەك جاعدايىنىڭ ناشارلىعى مەن جالاقىنىڭ ادىلەتسىزدىگىنە ءجيى شاعىنادى. اپتاپ ىستىقتىڭ استىندا كۇنى-ءتۇنى قارا مۇناي بۇرعىلايتىن جۇمىسشىلارعا الەۋمەتتىك قولداۋ از، كوبى ءتۇرلى اۋىر سىرقاتتارعا شالدىعىپ جاتادى.

“The Qazaq Times”