1 şildede tañerteñ Almatı policiyası Qıtay konsuldığı aldındağı piketti tüsirip jürgen belsendi Baybolat Künbolatwlın üyinen wstap äketti. Bwl turalı belsendiniñ äyeli Baqıt Sembayqızınıñ aqparatına süyengen Azattıq radiosı habarladı.

Azattıqtıñ jazuınşa, Künbolatwlınıñ anası Zauathan Twrsın, "Nağız Atajwrt eriktileri" wyımınıñ jetekşisi Bekzat Maqswthan da wstalğan.

Belsendi Kwnbolatwlınıñ äyeli Baqıt Sembayqızınıñ Azattıqqa aytuına qarağanda,  policiya qızmetkerleri wstau kezinde "özi men küyeuine küş qoldanğan". Qıtayda qamalğan inisine araşa swrağan belsendi Baybolat Künbolatwlı 29 mausımda 8 kündik äkimşilik qamaudan bosap şıqqan bolatın.

Aqparatqa qarağanda, Baybolat Künbolatwlı men anasın Naurızbay audanınıñ policiya bölimşesine alıp ketui mümkin. Sağat 10 jarım şamasında ol jaqqa Baybolat Künbolatwlınıñ äyeli eki balasımen bardı. Onı policiyadağılar işke kirgizdi. Al jurnalisterdi kirgizbedi. Policiya oqiğağa äzirge tüsinikteme bergen joq.

Qıtaydıñ Almatıdağı konsuldığı aldında piketterdiñ ötip jürgenine 140 künnen astı. Narazılar Qıtay biliginen Şıñjañda "jazıqtan-jazıqsız" qamalğan jaqındarın bosatudı talap etedi. Äli künge deyin konsuldıqtan narazılardıñ aldına eşkim şıqqan joq.

Säuir ayında Qıtaydıñ Qazaqstandağı elşisi Şıñjañda qamalğandardıñ "Qıtay azamatı" ekenin jäne olardıñ "Qıtay zañın bwzğanın" aytqan. Qazaqstan sırtqı ister ministrligi "özge eldiñ işki isine aralasa almaytının" aytıp keledi.

"The Qazaq Times"