Sayramsu şatqalı. Foto: geolocation.ws

Türkistan oblısında "Sayram-Ögem" şatqalında tağı bir adamnıñ denesi tabıldı. Bwl mamır ayınıñ soñında şatqalğa şığıp, joğalıp ketken jeti adamnıñ soñğısı boluı mümkin. Bwl turalı  tötenşe jağday ministrliginiñ baspasöz qızmeti habarladı.

Vedomstvo mälimetinşe, qwtqaruşılar mäyitti bügin, 22 mausım kündizgi sağat 12 şamasında Ayğırjıqqan jäne Ögem özenderiniñ toğısqan jerinen eki şaqırım joğarıda su tübinen tapqan.

"Mürdeni tasımaldau üşin "Qazaviaqwtqaru" AQ tikwşağı oqiğa ornına bara jatır. Tabılğan mäyit saraptama jasalu üşin policiya qızmetkerlerine tabıstaladı" delingen ministrlik habarlamasında.

Jeti student 21 mamır küni Tülkibas audanındağı "Sayram Ögem" şatqalına jayau tabiğatqa şığıp, joğalıp ketken. Keyin olardı qwtqaruşılarmen birge policiya, şekara qızmeti, wlttıq parktiñ qızmetkerleri men tuıstarı izdey bastağan. Jeti studenttiñ arasında Aqtöbe, Atırau, Oral jäne Jezqazğannan kelgender bolğan.

28 mamır küni joğalğandardıñ üşeui tiri tabıldı. Olardı "Qazaviaqwtqaru" tikwşağınıñ mamandarı bayqağan.

Keyin qwtqaruşılar şatqal aumağınan üş studenttiñ denesin tapqan. İzdeu jwmıstarı 27 kün jalğasqan. Oqiğağa baylanıstı Türkistan oblıstıq policiya departamenti qılmıstıq is qozğağan. Sotqa deyingi tergeu amaldarı jürip jatır.

"The Qazaq Times"