E.Birtanov. Foto: Tengrinews.kz

Qazaqstannıñ eks-densaulıq saqtau ministri Eljan Birtanovtıñ üyqamaq merzimi 14 şildege deyin wzartıldı. Mwnday şeşimdi bügin, 9 mausımda astananıñ mamandandırılğan audanaralıq tergeu sotı şığardı.

Prokuratura ökilderi bwrınğı ministrdiñ üyqamaq şartın qataytu turalı ötiniş tüsirse de, sud'ya Aqmaral Isaeva onı qanağattandırmağan. Bir kün bwrın prokuror Tölegen Jarasbaev sottan Birtanovqa tuıstarı men jaqındarınan basqa adammen söylesuge jäne medicinalıq mekemeden basqa jaqqa baruğa, wyalı telefon jäne özge de baylanıs qwraldarın qolddanuğa tıyım saludı swrağan.

Sot otırısı kezinde üş advokat pen Birtanovtıñ qoğamdıq qorğauşısı – bauırı Erjan Birtanov tergeu organdarınıñ "zañ bwzu äreketterin" alğa tartıp, eks-ministrdi üyqamaqtan bosatudı swrağan. Birtanovtıñ özi tergeu organdarınan qaşpaytının jetkizgen. Ol sottan "Birtanovtıñ şetelde üyi bar" dep "jalğan aqparat" bergen prokuratura men tergeu organdarınıñ äreketine qwqıqtıq bağa berudi ötingen.

Bir kün bwrın qorğau tarabı "is boyınşa ayğaq jinauğa kedergi keltirgen densaulıq saqtau ministrligine ayıppwl salınğanın" habarlağan.

50 jastağı Eljan Birtanov "asa kölemdegi byudjet qarjısın jımqırdı" degen küdikpen 2020 jıldın 7 qaraşasınan beri üyqamaqta otır. Onıñ üyqamaq merzimi bwğan deyin birneşe ret wzartılğan. Ol özine tağılğan ayıptardı joqqa şığaradı.

Eljan Birtanov 2017 jıldıñ qañtarınan 2020 jıldıñ mausımnıñ soñına deyin densaulıq saqtau ministri qızmetin atqarğan. Ol koronaviruspen auırğandar sanı kürt köbeyip, auruhanalarda orın jetpey qalğan twsta otstavkağa ketken. Onıñ ornına Aleksey Coy qızmetke keldi.

"The Qazaq Times"