2017 jılı Şımkent qalası Qaynarbwlaq eldi mekeninde 1200 oquşığa arnalıp aşılğan 125 jalpı orta mektebindegi eñbek-qılmıstıq dau büginde mıñ türlendi. Foto: aşıq derekköz

Bıltır Şımkent qalasında şu bolğan 125 mekteptegi dau jañaşa sipat aldı. Ministr men bilim basqarmasınıñ basşısı ornınan bosatqan jäne üş jıldan asa bilim ordasın «zañsızdıq oşağına» aynaldırdı degen küdikke ilikken, üstinen qılmıstıq is qozğalıp, tört birdey qwzırlı organ qızmetinen kemşilik anıqtağan eks-direktor bwrınğı ornına qayta oraldı.

Şımkent qalasınıñ bilim basqarması basşısı Janat Täjievanıñ orınbasarı Aygül Tekebaeva jäne basqarma zañgeri atı şığıp, qızmetimen qoştasqan bwrınğı direktordı ertip kelip mektep wjımına qayta tanıstırğan. Redakciyağa habarlasqan arızdanuşı mwğalimder mwnı zañsızdıq pen bassızdıqqa balaydı.

Qalalıq bilim basqarması, bilim sapasın baqılau bölimi, eñbek inspekciyası jäne memlekettik audit qızmeti siyaqtı tört birdey organnıñ zerdeleu jwmısımen mekteptiñ ötken 3 jılındağı kemşilik şaş etekten anıqtalğan. Resmi rastalğan derektiñ nätijesinde antikor tarapınan qılmıstıq is te qozğalğan. Saldarınan bıltır küzde eks-direktor Äset Satıbaldiev qızmetinen bosatılğan. Bilim ministri Ashat Aymağambetov komissiyanıñ eki rettik tekserisi boyınşa ondağan tarmaqtan twratın olqılıqtar qorıtındısın aytıp, eks-direktor men onıñ orınbasarı qızmetten şettetilgenin jeñistey mälimdegen.

Sıbaylas jemqorlıqqa qarsı is-qimıl agenttiginiñ Şımkenttegi departamentiniñ ağa tergeuşi Nwrdäulet Särsenbek Qılmıstıq kodeks boyınşa tergeu eki ayda sotqa joldanatının aytqan. 10 jeltoqsannan beri jartı jıl ötse de auır ayıptarmen küdikke ilikken direktor sudan taza, sütten aq dep tanılıp, bwrınğı lauazımına qayta tağayındaldı. Mwnıñ däleli retinde narazı mwğalimder redakciyağa bilim basqarması Janat Täjievanıñ bwyrığın wsındı. Qwjatta basqarma jetekşisi 2020 jılğı qaraşada şığarğan öz şeşimin teristep, Satıbaldievtiñ üyrenisken ornına oralğanı habarlanğan.

Şımkent qalalıq bilim basqarmasınıñ basşısı Janat Täjievanıñ öziniñ küzgi bwyrığın teristeuge arnalğan «qwpiyağa tolı» qwjatı. Foto: arızdanuşı wjımnan

Bir qızığı – Sıbaylas jemqorlıqqa qarsı is-qimıl agenttigi qozğağan negizgi qılmıstıq istiñ tergeui ayaqtalmay, sot ükimi şıqpay jatıp, eks-direktordıñ basqarmamen sottasıp, bilim oşağınıñ basşısı lauazımına layıq dep tanıluı deydi mwğalimder.

Basqarma basşısı Täjieva qızmet ornın joqtap özimen sottasqan eks-direktordı aqpanda jeñgenimen, mausımnıñ basında appelyaciyalıq deñgeyde jeñilip qalğanın aytadı. Ol redakciya tilşisine bergen komentariyinde respublikalıq joğarğı sotqa kassaciyalıq şağım tüsirgenin mälimdedi.

Atın körsetpeudi swrağan derekköz mälimetinşe, küdikti tarap ökili basqarma basşısı Täjievağa tuıstıq qatınası bar. Onıñ özi de osığan deyingi redakciya qoñırauına bergen jauabında alıs tuıstıq baylanısı barın rastağan.

Arızdanuşı mwğalimder wjımı bwl şeşimdi ädiletsizdik, zañ üstemdiginiñ joqtığınıñ körinisi dep sanaydı. QT baylanısqan Bilim jäne ğılım ministrligi äzirge resmi tüsinik bermedi.

Janat Täjieva aqpan ayındağı swhbatında «Men de jeñilmeymin, bilim prcesin wyımdastıra almağan, öz därejesine keltire almağan adamdı bilim wyımdarına qayta jaqındatudıñ keregi joq» dese de, jazda jağday basqaşa qwbılıp sala berdi. «Şımkenttik şeşim» kesedey töñkerile saladı deydi arızdanuşı tarap.

Üşinşi megapolistiñ bilim sayasatına jauaptı Täjieva qısqı mälimdemesinde sot eks-direktordıñ qızmetten bosatıluın negizsiz dep tapqan künniñ özinde basqarma «qwzırlı organdar tarapınan bwrınğı direktordıñ tarapınan zañ bwzılğanı anıqtalsa, ornınan bosatuğa qwqılı» ekenin mälimdedi. Sonımen qosa, ol Satıbaldievke eşqanday qısım bolmağanın, bosatu jönindegi arızdı densaulıq jağdayına baylanıstı öz erkimen jazğanın alğa tartqan.

Bıltır küzde 125 jalpı orta mektebinde birneşe jılğa jalğasqan bılıqtıñ beti aşılıp, äkimşilik pen wjımnıñ arasında dau tuğan edi. Bwl jöninde aqparat betterinde jariyalanıp, QT jartı jıldan beri zerttep keledi. 3,5 jıl bwrın esigin aşqan oqu ordasında mwğalimder «jemqorlıq, qarjı-mülik jımqıru jäne qızmetin asıra paydalana otırıp zañbwzuşılıqtarğa jol bergen» alğaşqı direktor men mañayındağı orınbasarların ayıptap şağım tüsirgen. Arızdanuşı wjımnıñ redakciyağa wsınğan derek-däyekteri boyınşa, üş jıldan beri mektepte qarjı jinau, auızbastırıq alu, käsipodaqtıñ birjaqtığı (direktorğa täueldiligi), gazet-basılımdarğa mäjbürli türde jazğızu, ot jağuşını jwmısqa ornalastırudan bastap dekretten oralğan qızmetkerdi jemqorlıqqa itermeleu, kanikulda remontqa, körnekilik qwraldarğa, äkimşilikke salınğan ayıppwldı öteuge jäne tuğan kün-merekelerge jönsiz aqşa jinau siyaqtı türli zañsızdıqtar orın alğan. Antikor jalpı arızdı naqtı jağdaylar boyınşa tolıqtırudı swrağanda är maman tap bolğan  zañbwzuşılıq turalı jekeley qosımşa arız tüsirgen. Arızğa 200-ge tarta maman qol qoyğan.

"The Qazaq Times"