«كۇدىكتى ديرەكتوردىڭ ورالۋى – زاڭسىزدىق»: مينيستر مەن باسقارما باسشىسىنىڭ شاماسى كەلمەيتىن شىمكەنتتىك شەنەۋنىك

بىلتىر شىمكەنت قالاسىندا شۋ بولعان 125 مەكتەپتەگى داۋ جاڭاشا سيپات الدى. مينيستر مەن ءبىلىم باسقارماسىنىڭ باسشىسى ورنىنان بوساتقان جانە ءۇش جىلدان اسا ءبىلىم ورداسىن «زاڭسىزدىق وشاعىنا» اينالدىردى دەگەن كۇدىككە ىلىككەن، ۇستىنەن قىلمىستىق ءىس قوزعالىپ، ءتورت بىردەي قۇزىرلى ورگان قىزمەتىنەن كەمشىلىك انىقتاعان ەكس-ديرەكتور بۇرىنعى ورنىنا قايتا ورالدى.

شىمكەنت قالاسىنىڭ ءبىلىم باسقارماسى باسشىسى جانات تاجيەۆانىڭ ورىنباسارى ايگۇل تەكەباەۆا جانە باسقارما زاڭگەرى اتى شىعىپ، قىزمەتىمەن قوشتاسقان بۇرىنعى ديرەكتوردى ەرتىپ كەلىپ مەكتەپ ۇجىمىنا قايتا تانىستىرعان. رەداكتسياعا حابارلاسقان ارىزدانۋشى مۇعالىمدەر مۇنى زاڭسىزدىق پەن باسسىزدىققا بالايدى.

قالالىق ءبىلىم باسقارماسى، ءبىلىم ساپاسىن باقىلاۋ ءبولىمى، ەڭبەك ينسپەكتسياسى جانە مەملەكەتتىك اۋديت قىزمەتى سياقتى ءتورت بىردەي ورگاننىڭ زەردەلەۋ جۇمىسىمەن مەكتەپتىڭ وتكەن 3 جىلىنداعى كەمشىلىك شاش ەتەكتەن انىقتالعان. رەسمي راستالعان دەرەكتىڭ ناتيجەسىندە انتيكور تاراپىنان قىلمىستىق ءىس تە قوزعالعان. سالدارىنان بىلتىر كۇزدە ەكس-ديرەكتور اسەت ساتىبالديەۆ قىزمەتىنەن بوساتىلعان. ءبىلىم ءمينيسترى اسحات ايماعامبەتوۆ كوميسسيانىڭ ەكى رەتتىك تەكسەرىسى بويىنشا ونداعان تارماقتان تۇراتىن ولقىلىقتار قورىتىندىسىن ايتىپ، ەكس-ديرەكتور مەن ونىڭ ورىنباسارى قىزمەتتەن شەتتەتىلگەنىن جەڭىستەي مالىمدەگەن.

سىبايلاس جەمقورلىققا قارسى ءىس-قيمىل اگەنتتىگىنىڭ شىمكەنتتەگى دەپارتامەنتىنىڭ اعا تەرگەۋشى نۇرداۋلەت سارسەنبەك قىلمىستىق كودەكس بويىنشا تەرگەۋ ەكى ايدا سوتقا جولداناتىنىن ايتقان. 10 جەلتوقساننان بەرى جارتى جىل وتسە دە اۋىر ايىپتارمەن كۇدىككە ىلىككەن ديرەكتور سۋدان تازا، سۇتتەن اق دەپ تانىلىپ، بۇرىنعى لاۋازىمىنا قايتا تاعايىندالدى. مۇنىڭ دالەلى رەتىندە نارازى مۇعالىمدەر رەداكتسياعا ءبىلىم باسقارماسى جانات تاجيەۆانىڭ بۇيرىعىن ۇسىندى. قۇجاتتا باسقارما جەتەكشىسى 2020 جىلعى قاراشادا شىعارعان ءوز شەشىمىن تەرىستەپ، ساتىبالديەۆتىڭ ۇيرەنىسكەن ورنىنا ورالعانى حابارلانعان.

شىمكەنت قالالىق ءبىلىم باسقارماسىنىڭ باسشىسى جانات تاجيەۆانىڭ ءوزىنىڭ كۇزگى بۇيرىعىن تەرىستەۋگە ارنالعان «قۇپياعا تولى» قۇجاتى. فوتو: ارىزدانۋشى ۇجىمنان

ءبىر قىزىعى – سىبايلاس جەمقورلىققا قارسى ءىس-قيمىل اگەنتتىگى قوزعاعان نەگىزگى قىلمىستىق ءىستىڭ تەرگەۋى اياقتالماي، سوت ۇكىمى شىقپاي جاتىپ، ەكس-ديرەكتوردىڭ باسقارمامەن سوتتاسىپ، ءبىلىم وشاعىنىڭ باسشىسى لاۋازىمىنا لايىق دەپ تانىلۋى دەيدى مۇعالىمدەر.

باسقارما باسشىسى تاجيەۆا قىزمەت ورنىن جوقتاپ وزىمەن سوتتاسقان ەكس-ديرەكتوردى اقپاندا جەڭگەنىمەن، ماۋسىمنىڭ باسىندا اپپەلياتسيالىق دەڭگەيدە جەڭىلىپ قالعانىن ايتادى. ول رەداكتسيا تىلشىسىنە بەرگەن كومەنتاريىندە رەسپۋبليكالىق جوعارعى سوتقا كاسساتسيالىق شاعىم تۇسىرگەنىن مالىمدەدى.

اتىن كورسەتپەۋدى سۇراعان دەرەككوز مالىمەتىنشە، كۇدىكتى تاراپ وكىلى باسقارما باسشىسى تاجيەۆاعا تۋىستىق قاتىناسى بار. ونىڭ ءوزى دە وسىعان دەيىنگى رەداكتسيا قوڭىراۋىنا بەرگەن جاۋابىندا الىس تۋىستىق بايلانىسى بارىن راستاعان.

ارىزدانۋشى مۇعالىمدەر ۇجىمى بۇل شەشىمدى ادىلەتسىزدىك، زاڭ ۇستەمدىگىنىڭ جوقتىعىنىڭ كورىنىسى دەپ سانايدى. QT بايلانىسقان ءبىلىم جانە عىلىم مينيسترلىگى ازىرگە رەسمي تۇسىنىك بەرمەدى.

جانات تاجيەۆا اقپان ايىنداعى سۇحباتىندا «مەن دە جەڭىلمەيمىن، ءبىلىم پرتسەسىن ۇيىمداستىرا الماعان، ءوز دارەجەسىنە كەلتىرە الماعان ادامدى ءبىلىم ۇيىمدارىنا قايتا جاقىنداتۋدىڭ كەرەگى جوق» دەسە دە، جازدا جاعداي باسقاشا قۇبىلىپ سالا بەردى. «شىمكەنتتىك شەشىم» كەسەدەي توڭكەرىلە سالادى دەيدى ارىزدانۋشى تاراپ.

ءۇشىنشى مەگاپوليستىڭ ءبىلىم ساياساتىنا جاۋاپتى تاجيەۆا قىسقى مالىمدەمەسىندە سوت ەكس-ديرەكتوردىڭ قىزمەتتەن بوساتىلۋىن نەگىزسىز دەپ تاپقان كۇننىڭ وزىندە باسقارما «قۇزىرلى ورگاندار تاراپىنان بۇرىنعى ديرەكتوردىڭ تاراپىنان زاڭ بۇزىلعانى انىقتالسا، ورنىنان بوساتۋعا قۇقىلى» ەكەنىن مالىمدەدى. سونىمەن قوسا، ول ساتىبالديەۆكە ەشقانداي قىسىم بولماعانىن، بوساتۋ جونىندەگى ارىزدى دەنساۋلىق جاعدايىنا بايلانىستى ءوز ەركىمەن جازعانىن العا تارتقان.

بىلتىر كۇزدە 125 جالپى ورتا مەكتەبىندە بىرنەشە جىلعا جالعاسقان بىلىقتىڭ بەتى اشىلىپ، اكىمشىلىك پەن ۇجىمنىڭ اراسىندا داۋ تۋعان ەدى. بۇل جونىندە اقپارات بەتتەرىندە جاريالانىپ، QT جارتى جىلدان بەرى زەرتتەپ كەلەدى. 3,5 جىل بۇرىن ەسىگىن اشقان وقۋ ورداسىندا مۇعالىمدەر «جەمقورلىق، قارجى-مۇلىك جىمقىرۋ جانە قىزمەتىن اسىرا پايدالانا وتىرىپ زاڭبۇزۋشىلىقتارعا جول بەرگەن» العاشقى ديرەكتور مەن ماڭايىنداعى ورىنباسارلارىن ايىپتاپ شاعىم تۇسىرگەن. ارىزدانۋشى ۇجىمنىڭ رەداكتسياعا ۇسىنعان دەرەك-دايەكتەرى بويىنشا، ءۇش جىلدان بەرى مەكتەپتە قارجى جيناۋ، اۋىزباستىرىق الۋ، كاسىپوداقتىڭ بىرجاقتىعى (ديرەكتورعا تاۋەلدىلىگى), گازەت-باسىلىمدارعا ءماجبۇرلى تۇردە جازعىزۋ، وت جاعۋشىنى جۇمىسقا ورنالاستىرۋدان باستاپ دەكرەتتەن ورالعان قىزمەتكەردى جەمقورلىققا يتەرمەلەۋ، كانيكۋلدا رەمونتقا، كورنەكىلىك قۇرالدارعا، اكىمشىلىككە سالىنعان ايىپپۇلدى وتەۋگە جانە تۋعان كۇن-مەرەكەلەرگە ءجونسىز اقشا جيناۋ سياقتى ءتۇرلى زاڭسىزدىقتار ورىن العان. انتيكور جالپى ارىزدى ناقتى جاعدايلار بويىنشا تولىقتىرۋدى سۇراعاندا ءار مامان تاپ بولعان  زاڭبۇزۋشىلىق تۋرالى جەكەلەي قوسىمشا ارىز تۇسىرگەن. ارىزعا 200-گە تارتا مامان قول قويعان.

"The Qazaq Times"