Aleksandr Lukaşenko jäne Vladimir Putin. Foto: pravda.com

Resey men Belarus' odaqtas memleketiniñ qwrıluı Ukrainağa qauip töndiredi. «Frankfurter Allgemeine Zeitung» gazetine swhbat bergen Vladimir Zelenskiy osılay dep mälimdedi.

«Resey men Belarus'tiñ birlesken jağdayda, bizge qısımdı arttıradı. Eki eldiñ ıntımaqtastığı künnen künge artıp otırğanı belgili», – dedi. Jeksenbide Belarus'tiñ Sırtqı ister ministri Vladimir Makey «Kommersant» gazetine Resey men Belarus'tiñ odaqtas memleket bolsa da, egemendigin saqtaydı degen. Makeydiñ aytuınşa, şağın memleketterge quattı resurstarğa ie bolmay, qanday da bir ekonomikalıq deñgeyge ötui qiın.

Eki eldiñ odaqtas atanuınan bölek, Qırım men Donbasstağı ahual da aytıldı. Bwğan deyin Zelenskiy Reseydi eskalaciyanıñ alğışarttarın qwrdı dep birneşe märte ayıptağan. Bwl mäselede Resey äskerleriniñ Ukraina şekaralarına jaqın şoğırlanuın dälel retinde keltirdi. «Eger birdeñe bolsa, Ukraina özin qorğay ma? Ärdayım» dep Kievtiñ kez kelgen jağdayğa dayın dedi.

Naurızda Donbasstağı janjal qayta uşıqqan. Türli habarğa qarağanda, Resey äskeri Ukraina şekarasına jaqın jerlerge şoğırlana bastağan. Mäskeu bwl äskerdiñ eşkimge qauip töndirmeytinin aytadı. Germaniya kancleri Angela Merkel'men telefon arqılı söylesken Vladimir Putin Mäskeudiñ bwl qadamğa öz qauipsizdigin qamtamasız etu üşin barğanın aytqan.

Resey 23 naurızda ayaqtalğan äskeri jattığulardan keyin Ukraina şekarasına jaqın aymaqtan äsker şığarmağandıqtan, AQŞ pen Euroodaq bwl jağdaydı qatañ baqılauğa alğan. Sebebi şekarağa äsker jiberu – memlekettiñ qauipsizdigine nwqsan keltirui mümkin. Sonımen birge, äleumettik jelilerde Resey Bryansk, Voronej jäne Rostov oblıstarına, anneksiyalanğan Qırımğa da äskeriler jiberip jatqandığı turalı habarlamalar jariyalandı. Bwl jağday halıqaralıq qauımdastıqtardıñ alañdauşılığın tudırdı. Al Putinniñ baspasöz hatşısı Dmitriy Peskov «Resey äskerleriniñ Resey aumağı arqılı ötui basqa memleketterdi mazalamauı kerek, öytkeni bwl olarğa eşqanday qauip töndirmeydi» – degen.

"The Qazaq Times"