زەلەنسكي: رەسەي-بەلارۋس وداعى ۋكرايناعا قىسىمدى ارتتىرادى

رەسەي مەن بەلارۋس وداقتاس مەملەكەتىنىڭ قۇرىلۋى ۋكرايناعا قاۋىپ توندىرەدى. «Frankfurter Allgemeine Zeitung» گازەتىنە سۇحبات بەرگەن ۆلاديمير زەلەنسكي وسىلاي دەپ مالىمدەدى.

«رەسەي مەن بەلارۋستىڭ بىرلەسكەن جاعدايدا، بىزگە قىسىمدى ارتتىرادى. ەكى ەلدىڭ ىنتىماقتاستىعى كۇننەن كۇنگە ارتىپ وتىرعانى بەلگىلى»، – دەدى. جەكسەنبىدە بەلارۋستىڭ سىرتقى ىستەر ءمينيسترى ۆلاديمير ماكەي «كوممەرسانت» گازەتىنە رەسەي مەن بەلارۋستىڭ وداقتاس مەملەكەت بولسا دا، ەگەمەندىگىن ساقتايدى دەگەن. ماكەيدىڭ ايتۋىنشا، شاعىن مەملەكەتتەرگە قۋاتتى رەسۋرستارعا يە بولماي، قانداي دا ءبىر ەكونوميكالىق دەڭگەيگە ءوتۋى قيىن.

ەكى ەلدىڭ وداقتاس اتانۋىنان بولەك، قىرىم مەن دونباسستاعى احۋال دا ايتىلدى. بۇعان دەيىن زەلەنسكي رەسەيدى ەسكالاتسيانىڭ العىشارتتارىن قۇردى دەپ بىرنەشە مارتە ايىپتاعان. بۇل ماسەلەدە رەسەي اسكەرلەرىنىڭ ۋكراينا شەكارالارىنا جاقىن شوعىرلانۋىن دالەل رەتىندە كەلتىردى. «ەگەر بىردەڭە بولسا، ۋكراينا ءوزىن قورعاي ما؟ ءاردايىم» دەپ كيەۆتىڭ كەز كەلگەن جاعدايعا دايىن دەدى.

ناۋرىزدا دونباسستاعى جانجال قايتا ۋشىققان. ءتۇرلى حابارعا قاراعاندا، رەسەي اسكەرى ۋكراينا شەكاراسىنا جاقىن جەرلەرگە شوعىرلانا باستاعان. ماسكەۋ بۇل اسكەردىڭ ەشكىمگە قاۋىپ توندىرمەيتىنىن ايتادى. گەرمانيا كانتسلەرى انگەلا مەركەلمەن تەلەفون ارقىلى سويلەسكەن ۆلاديمير پۋتين ماسكەۋدىڭ بۇل قادامعا ءوز قاۋىپسىزدىگىن قامتاماسىز ەتۋ ءۇشىن بارعانىن ايتقان.

رەسەي 23 ناۋرىزدا اياقتالعان اسكەري جاتتىعۋلاردان كەيىن ۋكراينا شەكاراسىنا جاقىن ايماقتان اسكەر شىعارماعاندىقتان، اقش پەن ەۋرووداق بۇل جاعدايدى قاتاڭ باقىلاۋعا العان. سەبەبى شەكاراعا اسكەر جىبەرۋ – مەملەكەتتىڭ قاۋىپسىزدىگىنە نۇقسان كەلتىرۋى مۇمكىن. سونىمەن بىرگە، الەۋمەتتىك جەلىلەردە رەسەي بريانسك، ۆورونەج جانە روستوۆ وبلىستارىنا، اننەكسيالانعان قىرىمعا دا اسكەريلەر جىبەرىپ جاتقاندىعى تۋرالى حابارلامالار جاريالاندى. بۇل جاعداي حالىقارالىق قاۋىمداستىقتاردىڭ الاڭداۋشىلىعىن تۋدىردى. ال ءپۋتيننىڭ ءباسپاسوز حاتشىسى دميتري پەسكوۆ «رەسەي اسكەرلەرىنىڭ رەسەي اۋماعى ارقىلى ءوتۋى باسقا مەملەكەتتەردى مازالاماۋى كەرەك، ويتكەنى بۇل ولارعا ەشقانداي قاۋىپ توندىرمەيدى» – دەگەن.

"The Qazaq Times"