Qazaqstan prezidenti Qasım-Jomart Toqaev pen Täjikstan prezidenti Emomoli Rahmon Foto: Akorda.kz

Keşe, 18 mamırdan beri Täjikstanda resmi saparmen jürgen Qazaqstan prezidenti Qasım-Jomart Toqaev bügin Täjikstan astanası Duşanbede el prezidenti Emomali Rahmonmen kezdesip, şağın formatta ekijaqtı kelissöz ötkizdi. Bwl turalı Aqorda saytı habarladı.

"Taraptar qazaq-täjik strategiyalıq äriptestiginiñ keñ auqımdı mäselelerin qarastırdı. Sonday-aq sayasi dialogtı nığaytuğa erekşe köñil böle otırıp, sauda-ekonomikalıq, investiciyalıq jäne mädeni-gumanitarlıq ıntımaqtastıqtı arttıru jağdayın talqıladı. Sonımen qatar Ortalıq Aziyadağı qauipsizdik pen twraqtılıqtı qamtamasız etu jäne halıqaralıq qwrılımdar ayasındağı özara ıqpaldastıq mäleleleri qozğaldı" delingen Aqorda taratqan resmi habarlamada.

Aqordanıñ jazuınşa, kezdesu barısında prezident Toqaev halıqaralıq kün tärtibindegi mäselelerge de toqtalıp, eki eldiñ BWW, ŞIW, EQIW ayasındağı özara tabıstı ıntımaqtastığın atap ötken. Kün tärtibindegi naqtı qanday mäseleler ekeni Aqorda taratqan habarlamada anıq aytılmağan.

Toqaev Täjikstanğa qırğız-täjik şekarasında bolğan qaqtığısstan keyin barıp otır. Alayda kezdesu barısında bwl mäsele jaylı söz qozğalğan-qozğalmağanı belgisiz. Bwğan deyin ol 28-30 säuirde Ferğana alqabında bolğan qarulı qaqtığısqa baylanıstı alañdauşılıq bildirip, eki jaqqa da tiimdi şeşim izdep, taraptardıñ özara senimin qalpına keltiru üşin qoldan kelgenniñ bärin jasaytının aytqan edi. 3 mamırda Toqaev qos memleket basşısımen söylesip, olardı wstamdı boluğa ündegen.

Bwl - Toqaevtıñ jıl bastalğalı şetelge jasağan alğaşqı saparı.

"The Qazaq Times"