قازاقستان پرەزيدەنتى قاسىم-جومارت توقاەۆ پەن تاجىكستان پرەزيدەنتى ەمومولي راحمون فوتو: Akorda.kz

كەشە، 18 مامىردان بەرى تاجىكستاندا رەسمي ساپارمەن جۇرگەن قازاقستان پرەزيدەنتى قاسىم-جومارت توقاەۆ بۇگىن تاجىكستان استاناسى دۋشانبەدە ەل پرەزيدەنتى ەمومالي راحمونمەن كەزدەسىپ، شاعىن فورماتتا ەكىجاقتى كەلىسسوز وتكىزدى. بۇل تۋرالى اقوردا سايتى حابارلادى.

"تاراپتار قازاق-تاجىك ستراتەگيالىق ارىپتەستىگىنىڭ كەڭ اۋقىمدى ماسەلەلەرىن قاراستىردى. سونداي-اق ساياسي ديالوگتى نىعايتۋعا ەرەكشە كوڭىل بولە وتىرىپ، ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق ىنتىماقتاستىقتى ارتتىرۋ جاعدايىن تالقىلادى. سونىمەن قاتار ورتالىق ازياداعى قاۋىپسىزدىك پەن تۇراقتىلىقتى قامتاماسىز ەتۋ جانە حالىقارالىق قۇرىلىمدار اياسىنداعى ءوزارا ىقپالداستىق مالەلەلەرى قوزعالدى" دەلىنگەن اقوردا تاراتقان رەسمي حابارلامادا.

اقوردانىڭ جازۋىنشا، كەزدەسۋ بارىسىندا پرەزيدەنت توقاەۆ حالىقارالىق كۇن تارتىبىندەگى ماسەلەلەرگە دە توقتالىپ، ەكى ەلدىڭ بۇۇ، شىۇ، ەقىۇ اياسىنداعى ءوزارا تابىستى ىنتىماقتاستىعىن اتاپ وتكەن. كۇن تارتىبىندەگى ناقتى قانداي ماسەلەلەر ەكەنى اقوردا تاراتقان حابارلامادا انىق ايتىلماعان.

توقاەۆ تاجىكستانعا قىرعىز-تاجىك شەكاراسىندا بولعان قاقتىعىسستان كەيىن بارىپ وتىر. الايدا كەزدەسۋ بارىسىندا بۇل ماسەلە جايلى ءسوز قوزعالعان-قوزعالماعانى بەلگىسىز. بۇعان دەيىن ول 28-30 ساۋىردە فەرعانا القابىندا بولعان قارۋلى قاقتىعىسقا بايلانىستى الاڭداۋشىلىق ءبىلدىرىپ، ەكى جاققا دا ءتيىمدى شەشىم ىزدەپ، تاراپتاردىڭ ءوزارا سەنىمىن قالپىنا كەلتىرۋ ءۇشىن قولدان كەلگەننىڭ ءبارىن جاسايتىنىن ايتقان ەدى. 3 مامىردا توقاەۆ قوس مەملەكەت باسشىسىمەن سويلەسىپ، ولاردى ۇستامدى بولۋعا ۇندەگەن.

بۇل - توقاەۆتىڭ جىل باستالعالى شەتەلگە جاساعان العاشقى ساپارى.

"The Qazaq Times"